Afmæli

Söngástríðan fylgir mér

Kristín R. Sigurðardóttir söngkona og Arnhildur Valgarðsdóttir organisti fagna nýliðnu fimmtugsafmæli þeirrar fyrrnefndu með tónleikum í Fella- og Hólakirkju í dag.

Kristín kennir söng, syngur í kórum og stjórnar. Á tónleikunum í dag sér hún ein um sönginn. Fréttablaðið/Ernir

Ljóðatónlist eftir Schubert og Richard Strauss og nokkur frönsk lög eftir Fauré hljóma á tónleikum sem hefjast klukkan 17 í dag í Fella- og Hólakirkju. Það eru þær Kristín R. Sigurðardóttir söngkona og Arnhildur Valgarðsdóttir organisti sem flytja. Tónleikarnir eru bæði í tilefni af stórafmæli Kristínar og hluti af tónleikaröð kirkjunnar.


Kristín kveðst hafa byrjaði að syngja í barnakór níu ára hjá Guðrúnu Birnu Hannesdóttur tónlistarkennara. „Þá uppgötvaðist röddin mín, segir hún glaðlega. „Ég hafði strax mjög gaman af að syngja og söngástríða fylgir mér.“ Ekki kveðst hún vera af söngfólki komin þó foreldrar hennar hafi haft góðar raddir. „Það var sko sungið heima þegar partí voru og mamma gat apað eftir Maríu Markan!“

Í Breiðholtinu átti Kristín heima frá sex ára aldri fram yfir tvítugt og hún fór í fjölbrautaskólann þar. „Ég byrjaði líka söngnám, sextán ára, í Tónskóla Sigursveins en fór þó ekki að taka það alvarlega fyrr en um tvítugt, þá búin að eiga tvö börn.“ Eftir nám í Söngskólanum, framhaldsnám á Ítalíu og kennaranám við Söngskólann hefur hún mikið fengist við kennslu. „Það eru átján ár sem ég hef verið að kenna. Var lengi við söngskóla Sigurðar Demetz, flutti mig svo um set og kenndi á Egilsstöðum í eitt ár og annað á Seyðisfirði. Þá vökvaði ég svolítið ræturnar því pabbi er ættaður að austan, úr Fellunum og Hjaltastaðaþinghá.“

Afmælisferð bíður sumarsins. Þá á að kíkja til Ítalíu. „Ég á góðar minningar frá Ítalíu síðan ég var þar við söngnám,“ segir Kristín sem kveðst hafa í ýmis horn að líta eins og er.  „Ég tók að mér afleysingu í Grindavík og keyri þangað einu sinni í viku núna í stuttan tíma. Svo tók ég mig til og fór í háskólann og stofnaði líka kór við Tækniskólann. Líf mitt hefur snúist mikið um söng. Ég hef ofsalega gaman af að kenna og starfa með kórum, syng næstum hvað sem er. Röddin mín er alltaf að þróast og vaxa og ég tengist henni alltaf betur og betur. Í söng kúpla ég mig frá amstri dagsins og kemst í algert núvitundarástand.“

Frítt er inn á tónleikana í dag og boðið upp á kaffi á eftir en tekið við frjálsum framlögum við innganginn. Allir eru velkomnir.

Athugasemdir

Auglýsing
Auglýsing

Tengdar fréttir

Tímamót

Bíllaus fagna tíu ára starfi

Merkisatburðir

Fyrsta blökkukonan krýnd fegurðardrottning

Auglýsing

Nýjast

Fyrst á svið fyrir 60 árum

Yrkir ádrepur af ýmsu tagi

Okkur fannst ótvíræð þörf fyrir þennan skóla

Aldarafmælis minnst með flutningi ljóða við ný lög

Hrókurinn fagnar 20 árum með stórmóti

Listin lengst af hliðargrein

Auglýsing