Kvikmyndin Með allt á hreinu eftir Stuðmenn í leikstjórn Ágústs Guðmundssonar var frumsýnd þennan mánaðardag árið 1982. Hún sló í gegn.

Með allt á hreinu er tónlistar- og grínmynd sem fjallar um tvær hljómsveitir, Stuðmenn og Gærurnar (Grýlurnar). Ástir og afbrýði meðlima hljómsveitanna koma við sögu og spaugileg atriði í ferðalagi þeirra um Ísland til tónleikahalds og skyggnilýsinga á sviðum félagsheimila.

Handritið er eftir Ágúst Guðmundsson, Eggert Þorleifsson og Stuðmenn og tónlistin eftir Stuðmenn, Grýlurnar og Sigurð Bjólu Garðarsson. Með aðalhlutverkin fara Eggert Þorleifsson, Ragnhildur Gísladóttir, Valgeir Guðjónsson, Tómas M. Tómasson, Egill Ólafsson og Jakob Frímann Magnússon.