Þann 14. janúar 1972 lést Friðrik 9. Danakonungur 72 ára að aldri en hann hafði verið konungur frá 1947. Margrét Alexandrína Þórhildur Ingrid fæddist 1940 og var elst þriggja dætra hans og Ingrid prinsessu af Svíþjóð.

Hún varð krónprinsessa árið 1953 þegar dönsku stjórnarskránni var breytt þannig að konur gætu líka erft krúnuna. Þegar Margrét tók við völdum varð hún fyrsta drottning Danmerkur síðan 1412 sem var á dögum Kalmar-sambandsins. Þá varð hún fyrsti þjóðhöfðingi landsins sem hvorki heitir Friðrik né Kristján síðan 1513.

Margrét Þórhildur giftist Henri de Laborde de Monpezat frá Frakklandi árið 1967. Henri, sem var kallaður Hinrik prins, lést í febrúar á síðasta ári. Þau eignuðust tvo syni, krónprinsinn Friðrik og prins Jóakim. Barnabörnin eru orðin átta.