Í tilefni Hinsegin daga 2019 verður opnuð hinsegin myndlistarsýning í Neskirkju í Reykjavík á sunnudaginn. Á sýningunni sem ber yfirskriftina „Regnbogabraut: Falin saga í 1200 ár“ verða kynnt verk eftir listamennina Logn Draumland, Viktoríu Guðnadóttur og Hrafnkel Sigurðsson.

Skúli S. Ólafsson, sóknarprestur Neskirkju, segir þema verka listamannanna byggja á regnbogaþræði sem er hinsegin leiðsögn á grunnsýningu Þjóðminjasafnsins, „Þjóð verður til“, sem var opnuð haustið 2018. „Þar þótti skorta á sýnileika hinsegin fólks. Eini augljósi minnisvarðinn um tilvist hinsegin fólks var regnbogafáni sem að lokum var fenginn fastur samastaður á færibandinu sem er táknmynd þjóðarsögunnar síðustu 119 árin,“ segir Skúli.

Niðurstaðan var samstarf Sjónlistaráðs Neskirkju og Þjóðminjasafnsins um að bjóða listafólki að vinna ný verk sem byggja á þemum í regnbogaþræðinum. Nýr meðlimur sjónlistaráðsins, Ynda Gestsson, átti frumkvæði að sýningunni.

Tengir þjóðkirkjuna við hinsegin fólk

Skúli segist afar spenntur fyrir sýningunni en þar er unnið út frá ýmsum stefjum sem tengjast baráttu hinsegin fólks, eins og regnboganum, fordómum og þöggun. „Verkunum er ætlað að veita innsýn í reynsluheim og tilfinningar hinsegin fólks gagnvart valdastofnunum þjóðfélagsins ásamt því að fagna fjölbreytileika sköpunar og mannlífs,“ segir hann. Skúli segir listkynningarnar mikilvægar fyrir safnaðarstarfið. „Við getum lagt út af þeim verkum sem eru í sýningu hverju sinni. Ég er að vonast til að byggja betri tengingar þjóðkirkjunnar við hinsegin fólk,“ segir sóknarpresturinn.

Hrafnkell: Myndeind frá Hubble

Hrafnkell Sigurðsson sem lauk meistaranámi í myndlist á Englandi árið 2002 hefur sýnt verk sín bæði á Íslandi og erlendis. Verk hans eru í einka- og opinberum söfnum víða um heim.

Í verki Hrafnkels „Upplausn“ er varpað fram þeirri hugmynd hvort hægt sé að leysa upp veruleikann og mannlega tilveru. Hann velur myndeind úr ljósmynd sem tekin var með Hubble-geimsjónaukanum og hefur verið stækkuð upp að ystu mörkum. Þar tekur ímyndunaraflið við og til verður flókinn raftextíll sem er vísir að stafrænu málverki. Með því að horfa sífellt dýpra inn í myndina er áhorfandinn leiddur lengra en nokkur hefur komist áður: að innstu myndeindinni, að kjarna regnbogans, tákni hinseginleikans.

Logn: Hinsegin feitir líkamar

Logn Draumland lauk háskólanámi í myndlist á Englandi árið 2015. Hán hefur sýnt bæði á Englandi og Íslandi og eru verk háns í einkasöfnum í báðum löndunum. Einnig hefur Logn annast sýningarstjórnun hérlendis sem og á Englandi þar sem hán hefur unnið fyrir myndlistarsamvinnuhópinn „(Inspire) d Wo(me)n“

Verk Logns ber titilinn „Hinsegin feitir líkamar, staðfesting á tilvist“. Verkið segir sögu skammar í íslenskri menningu heiðni, kristni og ríkjandi hugmyndafræði hvers tíma. Í kynningu á sýningu segir: „Til að snúa dæminu við, efla samtakamáttinn og valdefla þá valdalausu teflir Logn fram líkömum sem tengjast órjúfanlegum böndum þegar þau geysast fram og útúr römmunum til að skila skömminni þangað sem hún á heima í samfélagi fordóma, ofbeldis og kúgunar.“

Viktoría: Þöggun

Viktoría Guðnadóttir lauk meistaranámi í myndlist í Hollandi árið 2002. Hún hefur sýnt bæði á Íslandi og í Hollandi og eru verk hennar í einkasöfnum í báðum löndunum.

Í verkinu „Þöggun“ veltir Viktoría fyrir sér konu sem grafin er undir gleri í gólfi Þjóðminjasafnsins. Tengsl Viktoríu við hina látnu konu byggjast á vangaveltum um kynhneigð hennar og samsömun kvenna á ólíkum tímum. Viktoría segir að fátt hafi veitt samkynhneigðri konu skjól við upphaf Íslandsbyggðar. Söguheimildir sýna að kirkjulegum yfirvöldum hafi verið kunnugt um samkynja ástir. Í skriftaboðum Þorláks biskups frá 12. öld segir að það teljist synd ef „konur eigast við þangað til er þeim leysir girnd“. „Þessu flókna samspili þöggunar, kærleika og kúgunar kemur Viktoría á framfæri með djúpa samkennd að leiðarljósi án þess að ganga fram hjá sorg og sársauka,“ segir enn fremur í kynningu.

Sýningin á Hinsegin myndlist í Neskirkju, Reykjavík stendur frá sunnudegi 11. ágúst til loka októbermánaðar.