Hjónin Jófríður Benediktsdóttir, kjóla- og klæðskerameistari, og Hafliði Aðalsteinsson skipasmíðameistari voru valin heiðursiðnaðarmenn ársins 2020 fyrir einstakt framlag til íslenskrar þjóð- og iðnmenningar á árlegri Nýsveinahátíð Iðnaðarmannafélagsins í Reykjavík á laugardaginn.

Halldór Þ. Haraldsson, formaður Iðnaðarmannafélagsins í Reykjavík, segir þau sérlega vandvirkt fagfólk sem hafi verið iðnverki til sóma: „Að auki hafa þau bæði, hvort á sinn hátt, haldið uppi og miðlað áfram iðnþekkingu sem skipar mikilvægan sess í menningarsögu okkar Íslendinga,“ segir Halldór.

„Jófríður hefur um árabil haldið uppi heiðri íslenska þjóðbúningsins og kennt námskeið í þjóðbúningagerð og Hafliði er bátasmiður langt aftur í ættir og hefur miðlað þeirri þekkingu og sögu áfram,“ segir Halldór og tekur dæmi um endurgerð merks súðbyrðings sem er eins og bátur sem langafi Hafliða smíðaði árið 1890. Hefur hann verið tilnefndur til heimsminjaskrár UNESCO.

Nýsveinahátíðin var haldin í fjórtánda sinn á laugardaginn en tilgangur hennar er að veita ungum iðnaðarmönnum viðurkenningu fyrir framúrskarandi fagmennsku og efla virðingu fyrir iðnnámi.

Á hátíðinni afhenti forseti Íslands, Guðni Th. Jóhannesson, verðlaun til 23 iðnnema úr 14 iðngreinum og sjö skólum víðs vegar um landið, sem heiðraðir voru fyrir afburðaárangur á sveinsprófi.

„Iðnmenntun er verðmæt og eftirsótt menntun enda er er hún ein af grunnstoðum afkastamikils atvinnulífs og frábær valkostur fyrir ungt fólk í dag,“ segir Halldór. Hann segist stoltur af því að úr hópi þeirra 23 sem fengu viðurkenningu í ár eru ellefu konur og hefur hlutfall þeirra aldrei verið hærra.

Lilja Alfreðsdóttir, mennta- og menningarmálaráðherra, segist fagna því að nemendum fjölgi sem innritast á ákveðnar verk- og starfsnámsbrautir.

„Íslenskt samfélag þarf á iðnnemum að halda og því erum við að fagna í dag. Það er mikilvægt að hver og einn finni nám sem er áhugavert og spennandi. Ég óska heiðursiðnaðarmönnum innilega til hamingju með nafnbótina. Þau eru svo sannarlega vel að því komin,“ sagði ráðherra í tilefni af hátíðinni.