Hafþór Þórarinsson vélstjóri. Lést 10. maí 2019. Verður jarðsunginn frá Akureyrarkirkju föstudaginn 24. maí klukkan 13.30. Blóm og kransar vinsamlega afþakkaðir.

Við spyrjum drottin særð, hvers vegna

hann

hafi það dularfulla verklag

að kalla svo vænan vinnumann

af velli heim á bæ um miðjan dag.

Og þó, með trega og sorg, skal á það

sæst,

að sá með rétti snemma hvílast megi

í friði, er hafði, fyrr en sól reis hæst,

fundið svo til, að nægði löngum degi.

(Jóhann S. Hannesson)

Hafþór Þórarinsson, er hrifinn á brott og ekkert stendur eftir nema tómleikinn.

Sonur, stolt móður sinnar og föður, fallegur, duglegur og góð sál.

Hvernig er hægt að koma orðum að svo að þau veiti stuðning og styrk þegar harmurinn er svo mikill?

Með orðunum hans Bubba Morthens í Kveðju, sendi ég þér elsku Sigga og fjölskylda, ósk um að allar góðar vættir verði með ykkur á þessum erfiðu tímum.

Þar sem englarnir syngja sefur þú
sefur í djúpinu væra.
Við hin sem lifum, lifum í trú
að ljósið bjarta skæra
veki þig með sól að morgni
veki þig með sól að morgni.

Drottinn minn faðir lífsins ljóss
lát náð þína skína svo blíða.
Minn styrkur þú ert, mín lífsins rós
tak burt minn myrka kvíða.
Þú vekur hann með sól að morgni
þú vekur hann með sól að morgni.

Faðir minn láttu lífsins sól
lýsa upp sorgmætt hjarta.
Hjá þér ég finn frið og skjól.
Láttu svo ljósið þitt bjarta
vekja hann með sól að morgni
vekja hann með sól að morgni.

Drottinn minn réttu sorgmæddri sál
svala líknarhönd.
Og slökk þú hjartans harmabál
slít sundur dauðans bönd.
Svo vaknar hann með sól að morgni
svo vaknar hann með sól að morgni.

Farðu í friði vinur minn kær
faðirinn mun þig geyma.
Um aldur og ævi þú verður mér nær
aldrei ég skal þér gleyma.
Svo vöknum við með sól að morgni
svo vöknum við með sól að morgni.

Megi minning um góðan son, bróður og pabba ylja ykkur og styrkja um ókomna framtíð.

Kristín Helga Guðmundsdóttir