Þegar Friðrik, krónprins Danmerkur, heimsótti Hellisheiðarvirkjun Orku náttúrunnar í heimsókn sinni í síðustu viku var það rifjað upp að danska konungsfjölskyldan hefur áður komið við sögu orkumála í Reykjavík. Eiríkur Hjálmarsson hjá Orkuveitunni rifjaði upp eldri heimsóknir af þessu tilefni.

Fyrir réttum hundrað árum, sumarið 1921, vígðu langafi og langamma Friðriks prins, þau Kristján tíundi og Alexandrína drottning, þá splunkunýja rafstöð Reykvíkinga við Elliðaár.

Langalangafi Friðriks krónprins – Friðrik áttundi – kom einnig í Íslandsheimsókn. Það var árið 1907. Í ferð hans um Suðvesturland, sem farin var á hestum, var meðal annars áð við Kolviðarhól, en Hellisheiðarvirkjun stendur í landi Kolviðarhóls. Þar flutti kóngur ávarp þar sem hann vísaði til ríkja sinna tveggja, Danmerkur og Íslands. Um þetta leyti var hart deilt um sjálfstæði Íslands og varpaði kóngur sprengju inn í umræðuna með ummælum sínum þannig að danski forsætisráðherrann hótaði að segja af sér nema kóngur drægi orð sín til baka. Það gerði hann en engu að síður varð Ísland frjálst og fullvalda ríki í konungssambandi við Danmörku rúmum áratug síðar, 1. desember 1918.

Kristján konungur tíundi rennir fyrir laxi í Elliðaánum, sennilega árið 1921.
Mynd/Aðsend

Friðrik krónprins fór fyrir danskri viðskiptasendinefnd sem var að kynna sér orkumál og kolefnisförgun Carb­fix við virkjunina. Jeppe Kofod, utanríkisráðherra Danmerkur, var einnig í sendinefndinni sem hélt málþing í virkjuninni eftir að hafa farið út að niðurdælingarsvæði Carbfix og að vetnisstöð Orku náttúrunnar, VON, við virkjunina. Umbreyting rafmagns í aðra orkubera, þar á meðal vetni, var á meðal sérstakra áhugamála Dananna í viðskiptasendinefndinni.

Fyrir utan áhuga á kolefnisförgun Carbfix sýndu hinir tignu gestir mikinn áhuga á því hvaða aðferðum má beita til að umbreyta rafmagni í aðra orkubera. Græn raforkuvinnsla færist mjög í vöxt en eitt viðfangsefnanna við að leysa jarðefnaeldsneyti af hólmi er að geta nýtt umhverfisvæna orku sem víðast.