Guðrún Kvaran, fyrrverandi prófessor og forstöðumaður Orðabókar HÍ, er 75 ára í dag. Hún er að koma inn frá slætti þegar ég hringi og deginum áður kveðst hún hafa komið heim úr strangri göngu yfir Stuðlaskarð, milli Fáskrúðsfjarðar og Reyðarfjarðar. Hún heldur sem sagt ekki kyrru fyrir þó aldurinn hækki. „Mér finnst mér aldrei hafa liðið betur og hef alltaf nóg að gera,“ segir hún. „Ég er jafnt og þétt á Vísindavefnum, fékk átta spurningar í gær og þær eru orðnar yfir 1.100 sem ég hef svarað. Svo er ég í Íslenskri málnefnd sem gerir athugasemdir við málnotkun opinberra aðila, enda hefur virðingarleysi gagnvart tungumálinu færst mikið í vöxt.“

Guðrún ætlar að hitta sína nánustu í dag en fyrr á árinu bauð eiginmaðurinn, Jakob Yngvason fv. prófessor, henni í afmælisferð til Ástralíu.