Hinn 18. janúar árið 1968 var leigubílstjórinn Gunnar Sigurður Tryggvason skotinn til bana í leigubifreið sinni.

Í forsíðufyrirsögn Morgunblaðsins frá 19. janúar segir að líkur séu á að um ránmorð hafi verið að ræða en annað af tveimur veskjum Gunnars var horfið.

Talið er að Gunnar hafi verið skotinn í hnakkann í leigubíl sínum aðfaranótt þess nítjánda. Lögregla lýsti eftir mannaferðum í Laugarneshverfinu þar sem morðið var framið en Gunnar var skotinn með skammbyssu með hlaupvídd 32. Byssugerðin sem um ræddi var afar sjaldgæf á Íslandi en lögregla taldi að byssunni og skotunum hefði verið smyglað til landsins.

Það var svo ekki fyrr en rúmu ári síðar að byssan fannst og eftir rannsókn bandarísku alríkislögreglunnar, FBI, og síðar Scotland Yard í Bretlandi, var hægt að staðfesta að umrædd byssa væri morðvopnið. Einn maður sat lengi í gæsluvarðhaldi grunaður um morðið en hann var síðar sýknaður.