„Þið blindið mig!“ hrópaði djassgoðsögnin Ella Fitzgerald á íslenska ljósmyndara þegar hún steig út úr flugvélinni á Reykjavíkurflugvelli þann 25. febrúar 1966. Ella var kappklædd og hafði greinilega búist við vetrarhörkum á Íslandi en me henni í för voru hljóðfæraleikarar. Hún hafði ekki mikla lyst á að tala við íslenska blaðamenn heldur steig hún fljótt upp í bíl og brunaði burt.
Fernir tónleikar voru skipulagðir hjá Ellu en þeir voru heldur misheppnaðir. Miðar voru dýrir og stóri salurinn í Háskólabíói var langt frá því að vera fullur, svo að miðaverð var lækkað og aukatónleikar voru haldnir. Það dugði ekki til og var stórtap á tónleikunum. Þeir sem tryggðu sér miða voru þó að sögn hæstánægðir enda var Ella einn stærsti djasslistamaður heims á þessum tíma.
Ella var alls í fimm daga á Íslandi og sagði að ferðalokum að hún myndi aldrei syngja aftur á landinu. Hún stóð við orð sín enda heimsótti hún landið ekki á þeim 30 árum sem hún lifði eftir heimsókn sína til Íslands.
