Tímamót

Allir lásu Bláa hnöttinn

Nýlega útskrifaðist hópur fólks af erlendum uppruna úr tungumálaskólanum Dósaverksmiðjunni eftir íslenskunám á 7. stigi. Gígja Svavarsdóttir er þar framkvæmdastjóri.

Morgunkennararnir í Dósaverksmiðjunni, Guðrún Árnadóttir, Bjarki Ármannsson, Ásbjörg Jörundsdóttir, Sigrún Gunnarsdóttir og Gígja Svavarsdóttir. Fréttablaðið/Eyþór

Nemendurnir sem voru að útskrifast eru frá sjö þjóðum og tala allir góða íslensku,“ segir Gígja Svavarsdóttir, framkvæmdastjóri tungumálaskólans Dósaverksmiðjunnar. Hún segir hópinn hafa dvalið á Íslandi mismunandi lengi, allt frá einu ári upp í tólf og líka hafa fjölbreyttan bakgrunn. „Ein var að selja fyrirtækið sitt, önnur er barnalæknir, þá er hestakona sem vinnur á ferðaskrifstofu, byggingarverkfræðingur, viðskipta- og hagfræðingur, mannfræðinemi, markaðsfræðingur, blaðakona, heimavinnandi húsfaðir, mannabeinafræðingur og íþróttafræðingur.“

Allur hópurinn ákvað að velja sömu kjörbókina til lesturs, Bláa hnöttinn eftir Andra Snæ Magnason, að sögn Gígju. „Andri var með okkur þegar við lásum síðustu blaðsíðurnar og ræddi um efnið við hópinn.“

Gígja segir nemendum Dósaverksmiðjunnar fjölga stöðugt. „Í fyrra fóru 1.200 manns í gegn hjá okkur og nú stefnir í að við útskrifum 1.500. Kennararnir eru allir háskólamenntaðir og frá degi eitt er kennt á íslensku. Við byggjum á fjölbreyttri nálgun sem gefur góða raun, einkunnarorðin eru tungumál, menning, saga, matur og skemmtun. Við förum á söfn, í búðir, í Grasagarðinn, Heiðmörk og víðar. Eldum líka og borðum saman.“

Til að fá dvalarleyfi á landinu eða íslenskan ríkisborgararétt er nám af 3. stigi skylda. Gígja segir marga láta þar við sitja en Dósaverksmiðjan kenni allt upp í átta stig, sem sé næst á undan háskólastigi. Hún hefur kennt útlendingum íslensku í yfir 30 ár, í Námsflokkunum, í HÍ og var með eigin skóla á netinu um skeið meðan hún bjó á Ítalíu. Kveðst hafa flutt heim árið 2008 og morguninn eftir hafi Glitnir verið fallinn. „Ég er gift listamanni og við höfðum hjálpast að við íslenskukennsluna á netinu. Nú fórum við að kenna heima en 2012 fluttum við í Borgartún 1, í hús sem var byggt sem dósaverksmiðja og ákváðum að nota það nafn.“gun@frettabladid.is

Athugasemdir

Auglýsing
Auglýsing

Tengdar fréttir

Tímamót

Kolféll fyrir lírunni

Tímamót

Fræðimenn flykkjast á fornsagnaþing í Reykjavík

Tímamót

Stefni að því að verða 98

Auglýsing

Nýjast

Lag um #metoo byltinguna

Stephan G. Stephansson féll frá

Er á leið í forsetastól

Keppa í Fortni­te í fyrsta sinn á Ís­landi á HR-ingnum

Eyjólfur Sverris fagnar sínu fimmtugsafmæli með reisn

Kólumbus lét úr höfn í Palos á Spáni til að leita Indlands

Auglýsing