Dagurinn 18. júní er merkur í íslenskum leikhúsheimi þar sem Viðar Eggertsson leikstjóri og fyrrverandi útvarpsleikhússtjóri fagnar 65 ára afmæli. Hann á sama afmælisdag og Tinna Gunnlaugsdóttir, fyrrverandi þjóðleikhússtjóri. Þau tvö eru áratugnum yngri en Stefán Baldursson, einnig fyrrverandi þjóðleikhússtjóri. Að auki eru leikkonurnar Kristbjörg Kjeld (1935) og Vilborg Halldórsdóttir (1957) fæddar þennan dag.

Viðar Eggertsson sem er Norðlendingur að uppruna hefur starfað sem leikstjóri og leikari jöfnum höndum allt frá útskrift úr Leiklistarskóla Íslands árið 1976. Hann hefur leikið í um 6o leiksýningum og leikstýrt yfir 50 verkum á sviði auk leikstjórnar fyrir útvarp og sjónvarp. Hann stofnaði EGG-leikhúsið árið 1981 sem er einn elsti sjálfstæði leikhópurinn starfandi hér á landi og verið boðið með sýningar þess víða um heim. Viðar hefur hlotið margvíslegar viðurkenningar og verðlaun fyrir leikstjórn og leik.

Aðspurður um 65 ára afmælið segist Viðar brosandi ekki mikið vera fyrir sjálfshátíðir, gangi því hægt um þessar gleðinnar dyr eins og ýmsar aðrar. „En aldurinn á að vera tilhlökkunarefni, því það er eftirsóknarvert að þroskast og eldast; verða eitthvað sem maður hefur aldrei verið áður,“ segir afmælisbarnið.

Viðar hefur undanfarin ár unnið við margvísleg verkefni, en að mestu látið sig varða málefni þeirra sem eru á þriðja æviskeiðinu. Hann hefur verið verkefnastjóri fyrir Gráa herinn og Landssamband eldri borgara. Þar hefur hann m.a. unnið stiklur sem vöktu mikla athygli fyrr á árinu og voru sýndar í sjónvarpi og á samfélagsmiðlum. Þar var vakin athygli á manngildi og mikilvægi eldra fólks; fólks sem enn er í fullu fjöri og hefur svo margt fram að færa. „Það er kominn tími á að við blöndum hressilegum skammti af þroskadýrkun í samfélag okkar til að jafna út alla æskudýrkunina. Því við þörfnumst alls litrófsins,“ segir Viðar.

Er betra að vera roskinn eða ungur?

„Mér finnst æðislegt að verða eldri. Það er mikilvægt að reyna eitthvað sem maður hefur ekki áður gert eða verið. Hvert ár sem maður stendur andspænis er fullt af nýjum og spennandi áskorunum. Ég tek áskoruninni að verða loks 65 ára. En ég neita því ekki að ég væri miklu frekar til í að vera ungur í nútímanum. Ef ég hefði getað valið. Nútíminn er svo miklu áhugaverðari en árin sem ég var ungur. Þetta er opnara, skemmtilegra og mun betra þjóðfélag. Ég ólst upp í mun þröngsýnna og fábreytilegra samfélagi. Sem betur fer er það að baki … vonandi,“ segir hann.

Viðar er giftur til margra ára Sveini Kjartanssyni matreiðslumeistara og veitingamanni á AALTO Bistro í Norræna húsinu. Þeir búa á Herrasetrinu Skurn við Laufásveg í Reykjavík, ásamt hundinum Drakúla Viðarssyni Sveinssyni Kristjánssyni Kettler Hagalín Martin. „Hin langa nafngift ljúflingsins kemur til af öllum þeim er hafa passað hann og um leið tekið við hann ástfóstri. Hann nýtur mikillar og útbreiddrar ástar,“ segir Viðar.

Heldur þú þá ekkert upp á daginn?

„Það er hófstillt. Eiginmaður minn Sveinn eldaði ljúffengan kvöldverð í gær, 17. júní. Ætli sú veisla verði ekki bara látin duga þar til komið er að næstu afmælisveislu að ári!“