Tímamót

Aldarafmælis minnst með flutningi ljóða við ný lög

Steinunn Björg Ólafsdóttir söngkona frumflutti nokkur lög við ljóð afa síns, Þorsteins Jóhannssonar, kennara í Svínafelli í Öræfum, á hátíð sem haldin var í tilefni þess að 100 ár eru frá fæðingu hans. Lögin eru eftir Guðmund Óla Sigurgeirsson kennara.

Steinunn Björg, Guðjón Steinn og Guðmundur Óli hyllt og að sjálfögðu fékk tónskáldið líka blóm.

Það var mamma, Pálína Þorsteinsdóttir í Svínafelli, sem hafði forgöngu um að minnast þess að faðir hennar, Þorsteinn Jóhannsson, hefði orðið 100 ára 7. september, en hann lést fyrir tuttugu árum. Fjölskyldan gerði það með því að bjóða sveitungum og öðrum vinum og vandamönnum upp á veislukaffi og dagskrá í félagsheimilinu Hofgarði síðasta laugardag,“ segir söngkonan Steinunn Björg Ólafsdóttir.

„Afi orti mikið af ljóðum og vísum og hluti af þeim kom út á bók fyrir nokkrum árum, sem heitir Undir breðans fjöllum. Mamma vissi að hann Guðmundur Óli, kennari á Kirkjubæjarklaustri, hafði samið lög við fimm af ljóðunum og vissi líka að ég gat sungið þau. Svo hún notaði þetta tækifæri til að fá okkur til að flytja þau og ég held mér sé óhætt að segja að fólk hafi verið ánægt með framtakið.“

Steinunn Björg segir Guðmund Óla hafa lýst því á samkomunni að hann hefði fengið andann yfir sig úti á hlaði í Svínafelli er hann kom þangað í heimsókn, lögin hefðu komið til hans, nánast fullsköpuð og hann hefði sest niður og skrifað þau, þegar hann kom heim.

„Það var árið 2014, þegar ég hóf söngnám í Listaháskólanum, sem ég fór að spá í hvort ég gæti ekki gert eitthvað með þessi lög. Þau voru skrifuð fyrir hin ýmsu hljóðfæri og sum fyrir sópran, alt og karlaraddir og eitt fyrir alt og barítón, ég hefði þurft að redda stjórnanda svo þetta var svolítið flókið verkefni og það óx mér í augum,“ lýsir hún og heldur áfram:

„Guðmundur Óli hafði stundum samband og spurði hvort eitthvað væri að frétta og ég hafði mega samviskubit yfir að vera ekki búin að gera eitthvað af viti úr lögunum. En eftir á held ég bara að lögin hafi átt að bíða eftir þessu aldarafmæli. Nú spilaði Guðmundur Óli sjálfur undir á píanó og systursonur minn, Guðjón Steinn Skúlason á saxófón í tveimur lögum. Hann kom bara inn í dæmið kvöldið fyrir tónleika og rúllaði þessu upp, þaulvanur að spinna, enda í léttsveit og lúðrasveit í Reykjanesbæ.“

Steinunn Björg kveðst hafa fengið þennan frænda sinn líka til að flytja með henni lag eftir sjálfa sig við ljóð eftir afa hennar. „Við tókum það í þjóðlagarokkstíl í anda Skálmaldar. Það var dálítið gaman,“ segir hún. „Guðjón Steinn hafði tekið upp takta og eigið gítarspil á band og spilaði svo á bassa á sviðinu meðan ég söng. Ég ætla ekkert að sleppa hendinni af þessum frænda mínum, heldur reyni að halda honum góðum áfram og vona að honum þyki jafn gaman að vinna með mér og mér með honum.“

Heldur hún að lögin verði gefin út? „Það væri óskandi. Ég veit að Guðmundur Óli vill heyra þau með hljómsveit, eins og hann skrifaði þau upphaflega og ég vona að það verði að veruleika.“

Steinunn Björg er nýbyrjuð í meistaranámi við Listaháskólann í grein sem nefnist Sköpun, miðlun og frumkvöðlastarf og með henni í bekk eru fimm aðrir nemendur úr öllum heimshornum, með alls konar bakgrunn og á öllum aldri.“

Athugasemdir

Auglýsing
Auglýsing

Tengdar fréttir

Tímamót

Stofna sjóð til minningar um fjöl­hæfan lista­mann

Tímamót

Félag háskólakvenna heldur upp á 90 árin

Merkisatburðir

Fyrsta Harry Potter-bókin leit dagsins ljós

Auglýsing

Nýjast

Reykvíkingar tóku varla eftir lokum stríðsins

Mín faglega fjölskylda

Óænt tvist frá Póllandi í danskeppni götustílsins

Gúttóslagurinn í Reykjavík

Starfsaldurinn hærri en aldur kollega

Viljum lifandi umræður

Auglýsing