Fyrrum tenni­s­kappinn Sergi­y Stak­hov­sky er einn af þeim sem berst gegn inn­rás Rússa í Úkraínu. Sergi­y rann blóðið til skyldunnar og ferðaðist frá heimili sínu í Búda­pest til Úkraínu og skildi við fjöl­skyldu sína í Ung­verja­landi.

,,Ég trúði ekki því sem ég var að sjá og var um leið að reyna skilja hvar fjöl­skylda mín væri, hvað hún væri að gera og hversu slæmt þetta í raun og veru væri," segir Sergi­y Stak­hov­sky í sam­tali við BBC um líðanina þegar að hann frétti af inn­rás Rússa í Úkraínu.

Mánuði fyrir inn­rásina hafði Sergi­y verið að spila í undan­keppni Opna ástralska meistara­mótsins í Tennis en tap þar leiddi til þess að hann á­kvað að binda enda á 19 ára feril sinn sem at­vinnu­maður í tennis.

Um leið og hann frétti af inn­rás Rússa í sím­tali við for­eldra sína sem búa í Kænu­garði vissi Sergi­y hvert sitt næsta skref yrði. Á þeim tíma var hann í fríi með fjöl­skyldu sinni í Dúbaí og fór með þau í flýti til Búda­pest þar sem þau hafa búið undan­farin ár.

Þegar komið var til Búda­pest spurði eigin­kona hans fyrir um það hvað það væri sem hann ætlaði sér að gera.

,,Ég gaf henni svar sem hún vildi ekki heyra, hún fór í upp­nám. Ég hafði verið full­trúi Úkraínu á al­þjóða­vett­vangi í rúm 17 ár og gat ekki hugsað mér að vera einn af þeim sem hlyti þau for­réttindi að halda mig frá því sem er að eiga sér stað í heima­landi mínu."

Sergi­y pakkaði niður nauð­synjum og segist hafa laumast út af heimili sínu. ,,Börnin mín voru að lesa og horfa á teikni­myndir og ég á­kvað að ó­náða þau ekki. Sá eini sem sá mig fara var yngsti sonur minn og hann spurði mig: 'Pabbi, hvert ertu að fara?' Ég var með bak­pokann á mér og sagðist koma fljótt aftur.

Myndi ekki hika

Leið Sergiys lá fyrst til Bratislava í Slóvakíu. Þar náði hann í nauðsynlegan búnað fyrir sig og samlanda sína, búnað fyrir átök. Skotheld vesti og hjálma. Síðan lá leið hans að landamærumum Úkraínu.

Þar hitti hann félaga sinn og þeir héldu til Lviv, þar gistu þeir í eina nótt áður en þeir héldu til Kænugarðs að hitta föður og bróður Sergiys en Sergiy hafði skipulagt flóttaleið fyrir móður sína og aðra ættingja út úr Úkraínu.

Sergiy var úthlutað í herdeild og í henni hefur hann verið síðan þá. ,,Fólkið sem bjó hérna átti þetta ekki skilið. Þau eru ekki hluti af þessu stríði, þau vildu þetta ekki. Þetta voru bara almennir borgarar."

Hann segist ekki muna hika ef hann kemst í návígi við rússneskan hermann. ,,Ég veit hvað ég myndi gera.

Ítarlegt viðtal við Sergiy Stakhovsky við BBC má lesa hér.