Kólumbíski knattspyrnumaðurinn Andres Balanta er látinn aðeins 22 ára að aldri. Balanta hneig niður á æfingu með liði sínu Atletico Tucuman og tilraunir til endurlífgunar, sem stóðu yfir í 40 mínútur, báru ekki árangur.

Balanta hafði spilað með yngri landsliðum Kólumbíu og var á sínum tíma talinn afar efnilegur knattspyrnumaður. Hann samdi við argentínska knattspyrnuliðið Atletico Tucuman fyrr á árinu en liðið staðfesti andlát Balanta í yfirlýsingu.

Argentínska knattspyrnugoðsögnin Sergio Aguero var í beinu streymi á Twitch er hann heyrði tíðindin af andláti Balanta en Aguero þurfti sjálfur að leggja knattspyrnuskóna á hilluna vegna heilsufarsvandamála.

Aguero var skiljanlega brugðið er hann frétti af andláti Balanta
Fréttablaðið/Skjáskot

Balanta fæddist í Santiago de Cali í Kólumbíu árið 2000. Hann hlaut knattspyrnulegt uppeldi hjá Deportivo Cali en gekk síðan til liðs við Atletico Tucuman í júlí fyrr á þessu ári og gerði sér vonir um að vinna sér inn sæti í A-landsliði Kólumbíu.