Svo getur farið að stórar breytingar verði gerðar á skipu­lagi heims­meistara­mótsins í knatt­spyrnu. Á­kvörðun um hvort fjölga eigi leikjum á heims­meistara­mótinu í knatt­spyrnu úr 64 leikjum upp í 104 gæti verið tekin á næstunni en hug­myndirnar verða kynntar á aðildar­þjóðum sam­bandsins á næstu dögum en árs­þing FIFA hefst í Rúanda á fimmtu­daginn.

Sky Sports greinir frá en aðal ástæðan að baki fjölgun leikja á HM er sú að með því myndi FIFA ná áætlunum sínum um að hala inn því sem nemur 9 milljörðum punda í tekjur.

Á sama tíma myndi fjölgun leikja einnig leysa úr ákveðnum skipulagsvanda fyrir FIFA fyrir næsta heimsmeistaramót.

Nú þegar hefur verið samþykkt að fjölga liðum á HM úr 32 í 48 lið en í stað þess að hafa 16 riðla með þremur liðum í hverjum og einum riðli er þeim möguleika nú velt upp að hafa 12 riðla með fjórum liðum í hverjum og einum.

Næsta heimsmeistaramót fer fram í Bandaríkjunum, Kanada og Mexíkó árið 2026