Víkingur Reykjavík hefur tekið yfir mannvirki í Safamýrinni sem voru áður á vegum Fram og verða um leið nýja hverfisfélagið í því hverfi Reykjavíkur. Þetta kemur fram í tilkynningu frá Víkingum.

,,Það er með mikilli ánægju að staðfesta til ykkar að frá og með þessari viku hefur Víkingur formlega tekið við mannvirkjum í Safamýri og um leið sem nýja hverfisfélagið ykkar. Við erum afar stolt að fá þetta hlutverk og við lofum að við munum vinna á einlægan máta með ykkur hverfisbúum á öllum aldri að skapa mjög öflugt og fjölbreytt íþróttastarf í Safamýri og hverfinu og um leið veita góða þjónustu til ykkar allra og vera til staðar," segir meðal annars í tilkynningu Víkinga.

Í samvinnu Víkings og Reykjavíkurborgar munu mannvirkin í Safamýri fara núna í úttekt, tiltekt og viðhald að innan sem utan. 

Nýjar merkingar munu koma á mannvirkin á næstu vikum.  ,,Við reiknum með að þessi vinna taki 2-3 vikur og stefnum við á að opna endurbætt mannvirki í Safamýri frá og með mánudeginum 22/08 næstkomandi eða á sama tíma og nýtt skólaár er að hefjast.  Ráðnir hafa verið starfsmenn í húsið."

Félagið mun eiga fundi áður en nýtt skólaár hefst með hverfisskólunum og leiksskólunum hverfisins.  Þá eru fyrirhugaðir fundir með foreldrafélögum skólanna snemma í september.