Vigtunin fyrir bardaga Gunnars Nelson og Leons Edwards á laugardaginn fer fram í O2-höllinni í London í dag, degi áður en þeir mætast í búrinu í sömu höll sem tekur um 20 þúsund manns. 

Vigtunin fer fram um kvöldmatarleytið í London og er þess krafist að keppendurnir, Gunnar og Leon sem keppa í veltivigt, séu á bilinu 71-77 kíló þegar mælingar fara fram.

Bardagi Gunnars er einn af aðalbardögum kvöldsins ásamt bardaganum þegar Darren Till mætir Jorge Masvidal og mætir Gunnar heimamanninum Edwards sem ólst upp í Birmingham, einni af stærstu borgum Bretlands.

Gunnar kom til Lundúna á þriðjudaginn og hefur eytt undanförnum dögum í æfingar í Bretlandi ásamt því að sinna þeim fjölmiðlaskyldum sem fylgja bardögum innan UFC-samtakanna.