Viaplay verður eina streymisveitan með sýningarréttinn á Sky Bet Championship-deildinni og Carabao Cup á öllum Norðurlöndunum og Eystrasaltsríkjunum, Póllandi og Hollandi frá og með 2022. Þetta kemur fram í fréttatilkynningu frá Viaplay.

Á hverju einasta tímabili verða meira en 180 leikir í beinni útsendingu frá ensku B-deildinni, þar á meðal undanúrslit og úrslit umspilsins um laust sæti í ensku úrvalsdeildinni þar sem miklir fjármunir verða í húfi.

The Sky Bet Championship-deildin er fjórða vinsælasta deild Evrópu, yfir 20 milljónir aðdáenda mæta á leiki liðanna á hverju tímabili. Síðastliðin ár hafa þekkt félög á borð við Aston Villa, Derby County, Fulham, Newcastle United, Nottingham Forest og West Bromwich Albion spilað í deildinni.

Hjörvar Hafliðason íþróttastjóri Viaplay á Íslandi hafði þetta að segja um málið: „Fótboltaunnendur vita að það jafnast fátt á við enska knattspyrnu þar sem koma saman miklir hæfileikar, gríðarleg ástríða, magnaðar hefðir og óútreiknanleg úrslit. Við erum nú þegar að sýna frá fjölbreyttu íþróttaefni, en erum hástánægð með þessa viðbót, að fá bæði enska deildabikarinn og ensku Championship-deildina inn á heimili íþróttanna hér á Viaplay.“