Streymisþjónustan Viaplay hefur tryggt sér aðild að Meistaradeild Evrópu og kemur til með að deila sýningaréttinum að stærstu keppni heims næstu árin með Sýn. Úrslitaleikurinn verður sýndur á Viaplay á næsta ári.

Þetta kemur fram í tilkynningum frá Viaplay og Sýn í dag. Með því tryggir Viaplay sér hlutdeild að sýningarétti að Meistaradeild Evrópu, Evrópudeildinni og nýrri keppni sem UEFA vinnur að fyrir minni liðin.

Slíkt fyrirkomulag hefur þekkst í Bretlandi um árabil þar sem ITV og SkySports deildu sýningaréttinum um árabil en í dag er það BT Sport sem er rétthafinn.

Með því mun Viaplay sýna frá sextíu leikjum í Meistaradeild Evrópu á hverju ári og úrslitaleikinn árið 2022. Árið 2023 og 2024 verða úrslitaleikirnir sýndir á báðum stöðvum

„Viaplay heldur áfram að móta landslag streymisveita á Íslandi með því að bæta við hágæða íþróttaafþreyingu, ásamt ört stækkandi sjónvarpsseríum og kvikmyndaefni. Að tryggja einkarétt til sýninga á UEFA Evrópsku úrvalsdeildunum næstu þrjú árin er mikilvægt skref og er enn einn áfanginn í okkar einstaka langtímasambandi við UEFA. Þetta eru frábærar fréttir fyrir íslenskt íþróttaáhugafólk," segir Anders Jensen, forstjóri NENT GROUP í fréttatilkynningunni

Í tilkynningunni sem Sýn sendi frá sér segir Eiríkur Stefán Ásgeirsson, forstöðumaður Stöðvar 2 Sport að það sé fagnaðarerindi að halda sýningaréttinum áfram á Sýn þótt að honum sé deilt.

„Það er ánægjulegt að ná að tryggja áframhaldandi útsendingar og innlenda þáttagerð tengdri Meistaradeildinni, Evrópudeildinni og svo spennandi nýjungar, Conference League, þar sem íslensk félagslið geta mögulega verið þátttakendur. Samstarfið við Viaplay er í takt við þróun víða um heim þar sem algengt er að sýningarréttum sem þessum sé deilt. Stöð 2 Sport hefur útvíkkað ýmiskonar samstarf undanfarið og selur t.a.m. í dag aðgang að NFL Game Pass á frábæru verði og fljótlega mun samskonar samstarfi við NBA vegna NBA League Pass verða ýtt úr vör. Þessu fylgir svo fjölbreytt innlend dagskrárgerð í ýmsu formi tengdum útsendingum.“