Rebekah Vardy tapaði meiðyrðamáli sem hún höfðaði gegn Coleen Rooney, eiginkonu ensku knattspyrnugoðsagnarinnar Wayne Rooney. Coleen hafði áður sakað Vardy um að hafa lekið upplýsingum um einkalíf Rooney fjölskyldunnar til slúðurblaðsins The Sun. Dómari í málinu kvað upp úrskurð sinn fyrr í dag.

Að mati dómara í málinu verður það að teljast líklegt að Caroline Watt, umboðsmaður Rebekuh Vardy hafi tekið við upplýsingum um einkalíf Rooney fjölskyldunnar og komið þeim áfram/selt þær til The Sun.

,,Sönnunargögnin benda hins vegar skýrmerkilega til þess að Vardy hafi vitað af þessum gjörðum umboðsmannsins. Það sýna meðal annars skilaboð þeirra á milli á samfélagsmiðlinum Instagram," sagði dómarinn sem kvað upp úrskurð sinn í málinu.

Sjá einnig
Roon­ey segir frá stundinni sem hún gómaði Var­dy

Deilur kvennanna tveggja hafa staðið yfir í langan tíma en Rebekah á­kvað að fara með málið fyrir dóm­stóla eftir að Co­leen á­sakaði hana um að leka upp­lýsingum um einka­líf hennar til breska slúður­miðilsins The Sun. Málið hefur teygt anga sína inn í um­hverfi enska boltans en Rebekah er eigin­kona Jamie Var­dy, fram­herja enska úr­vals­deildar­fé­lagsins Leicester City.

Co­leen greindi opin­ber­lega frá á­sökunum sínum í Twitter­færslu í októ­ber árið 2019 þar sem hún sagðist hafa haft grun um að Rebekah hafi verið að leka upp­lýsingum um einka­líf sitt til The Sun.

Roon­ey fylgdist náið með Insta­gram reikningi sínum og setti inn efni sem að­eins vinir og vanda­menn fengu að­gang að, þar með talið Rebekah Var­dy. Hún segist smám saman hafa fækkað í þeim hópi sem sá efnið sem hún setti inn þar til að Rebekah Var­dy stóð ein eftir.