Vanda var í viðtali í Morgunútvarpinu á Rás 2 í morgun þar sem hún greindi frá þessu.

„Ég ætla vera hreinskilinn, ég var eiginlega buguð eftir þetta, fannst þetta hrikalega leiðinlegt og var sorgmædd í hjartanu að við hefðum þurft að komast að þessari sameiginlegu niðurstöðu. Ég hefði bara farið að gráta, ég var bara þar. Ég bað Ómar Smárason um að fara í viðtölin fyrir mig. Ég þurfti bara aðeins að ná mér. Ég gat eiginlega ekkert sofið þessa nótt og leið ömurlega," sagði Vanda en Ómar Smárason er deildarstjóri samskiptadeildar sambandsins.

„Það var ekkert að segja, í yfirlýsingunni og í þeim svörum sem Ómar gaf var allt sem var að segja," sagði Vanda Sigurgeirsdóttir, formaður KSÍ í viðtali í Morgunútvarpinu á Rás 2.

KSÍ sendi frá sér yfirlýsingu rétt fyrir miðnætti þann 23. nóvember síðastliðinn þar sem greint var frá ákvörðun stjórnarinnar.

Stjórn KSÍ og Eiður Smári Guðjohnsen hafa komist að samkomulagi um starfslok hans sem aðstoðarþjálfari A landsliðs karla. Samkomulagið snýr að því að virkjað hefur verið endurskoðunarákvæði í ráðningasamningi sem gerður var milli hans og KSÍ og mun hann láta af störfum 1. desember næstkomandi.

Eiður Smári, sem lék á sínum tíma 88 A-landsleiki og skoraði í þeim 26 mörk, hefur verið í þjálfarateymi liðsins frá desember 2020 og starfað með því í öllum leikjum ársins 2021 – þremur vináttuleikjum og 10 leikjum í undankeppni HM 2022.

„Samkomulag um starfslok mín voru tekin með hagsmuni mína, landsliðsins og KSÍ að leiðarljósi. Ég vil þakka öllum innan sambandsins fyrir frábært samstarf undanfarið ár. Síðasta ár hefur verið mjög krefjandi bæði innan vallar sem og utan bæði fyrir mig persónulega sem og sambandið. Áfram Ísland!“ segir Eiður Smári.

KSÍ þakkar Eiði Smára fyrir hans störf og óskar honum velfarnaðar í framtíðinni.