Líkt og fram hefur komið þá tóku stjórn KSÍ og Eiður Smári Guðjohnsen sameiginlega ákvörðun um starfslok hans sem aðstoðarþjálfari A-landsliðs karla. Í kjölfarið hafa fjölmiðlar leitað svara um málið.

Af sjálfsagðri virðingu við einkalíf Eiðs Smára þá höfum við, ég sem formaður KSÍ, stjórn og starfsfólk KSÍ, farið þá leið að tjá okkur ekki í smáatriðum um tildrög starfsloka hans. Við viljum ekki og getum ekki rætt hans persónulegu mál í fjölmiðlum. Þar þarf hann að stjórna ferðinni sjálfur.

Ákvörðun sem þessi er alltaf þungbær, á sér langan aðdraganda og er ekki tekin nema að vel ígrunduðu máli. Aftur óskum við Eiði velfarnaðar og þökkum honum góð störf.

Stjórn KSÍ hefur þegar rætt og mun ræða áfram hvort ástæða sé til þess að hætta að veita hóflega áfengi að verkefnum loknum.

Nú tekur við vinna við leit að nýjum aðstoðarþjálfara þar sem þjálfari liðsins, Arnar Þór Viðarsson, mun að sjálfsögðu ráða ferðinni. Vonandi gengur sú leit hratt og örugglega fyrir sig og við finnum réttan aðila í starfið við hlið Arnars til að leiða áframhaldandi uppbyggingu á þessu unga og spennandi landsliði.

Kveðja,

Vanda Sigurgeirsdóttir, formaður KSÍ

Tengist persónulegum málefnum Eiðs

Uppsagnarákvæði var virkjað í samningi Eiðs Smára Guðjohnsen, aðstoðarþjálfara íslenska karlalandsliðsins á mánudaginn og hann mun því láta af störfum þann 1. desember næstkomandi.

Starfslok Eiðs Smára eru sögð tengjast persónulegum málefnum hans en samkvæmt heimildum DV má ástæðu starfslokanna rekja til gleðskapar á vegum KSÍ sem haldinn var eftir leik íslenska karlalandsliðsins gegn Norður-Makedóníu er liðið lauk keppni í undankeppni Heimsmeistaramótsins í Katar.

Heimildir mbl.is herma að Vanda hefði viljað halda Eiði Smára í starfi aðstoðarlandsliðsþjálfara. Samkvæmt heimildum mbl.is var stjórn KSÍ klofin í afstöðu sinni til þess hvort nýta ætti uppsagnarákvæðið í samningi Eiðs Smára.