Arnar Þór Viðars­son, lands­liðs­þjálfari Ís­lands, hefur verið upp við kaðlana í rúmt ár, svör hans í kringum hita­mál lands­liðsins hafa oft á tíðum ekki verið sann­færandi og gengi liðsins slakt. Þjálfarinn mætti hins vegar klár í slaginn á frétta­manna­fund síðasta föstu­dag þar sem hann valdi hóp sinn fyrir komandi verk­efni.

Heiðar­leiki er oft eitt­hvað sem vantað hefur í svör Arnars en þegar kom að því að ræða mál Alberts Guð­munds­sonar var þjálfarinn loks heiðar­legur í svörum. Blaða­menn Frétta­blaðsins vissu af vanda­málum í sam­skiptum Arnars og Alberts í verk­efni liðsins í júní og spurðu þjálfarann út í þau. Þá þóttist Arnar koma af fjöllum þegar hann var spurður.

Nú á­kvað Arnar að vera heiðar­legur með málið og sagði frá því að hegðun Alberts hefði orðið til þess að hann vilji ekki vinna með honum á næstunni. Ekki eru allir sam­mála um að rétt sé að taka Albert út úr hópnum en valið er þjálfarans og ef hann hefur engan á­huga á að vinna með leik­manni er betra fyrir alla að sá leik­maður sitji heima. Arnar var hið minnsta heiðar­legur í svörum.Arnar hefði hins vegar getað verið ögn heiðar­legri í svörum sínum þegar hann fór að ræða Birki Bjarna­son.

Hann sagði Birki hafa staðið sig frá­bær­lega innan sem utan vallar undan­farið ár, vel má vera að Birkir hafi staðið sig frá­bær­lega utan vallar í erfiðri stöðu en innan vallar hefur Birkir átt veru­lega erfitt upp­dráttar. Í gögnum sést að hlaupa­tölur Birkis eru ekki þær sömu og skilaði miðju­maðurinn rétt um átta kíló­metrum í einum af leikjum sumarsins.

Birkir var þá einn sem djúpur miðju­maður og eðli­legar tölur væru í kringum 12 kíló­metra. Birkir hefur verið langt frá sínu besta innan vallar með lands­liðinu um langt skeið og það sér Arnar Þór Viðars­son eins og allir aðrir sem vilja sjá það. Vonandi finnur Birkir sitt gamla form í komandi verk­efni en hann er leikja­hæsti leik­maður í sögu Ís­lands.