Mögulegi áttundi heimsmeistaratitill Hamilton, rann honum úr greipum á lokahring í lokakeppni tímabilsins í Abu Dhabi um síðustu helgi eftir mikla ringulreið.

,,Það mun taka langan tíma fyrir okkur að melta það sem átti sér stað á sunnudaginn. Ég efast um að það muni nokkurntímann gerast. Þá sér í lagi fyrir Hamilton sem ökumann. Ég vonast til þess að við komumst í gegnum þeta sem lið og getum unnið úr þessum aðstæðu en hann mun aldrei komast yfir sársaukann og kvölina sem fylgdi sunnudeginum," sagði Toto Wolff í viðtali við Sky Sports.

Toto Wolff, liðsstjóri Mercedes
GettyImages

Þegar Toto var spurður að því í viðtalinu hvort Hamilton myndi snúa aftur á næsta tímabili segir hann það ekki víst. ,,Ég vonast til þess að Lewis haldi áfram að keppa vegna þess að hann er besti ökumaður allra tíma. Sem kappakstursökumaður mun hjarta hans segja honum að hann verði að halda áfram vegna þess að hann er á toppi síns ferils þessa stundina."

Verðlaunahátíð FIA fer fram í París í kvöld. Þar mun Max Verstappen, ökumaður Red Bull Racing, fá í hendurnar sinn fyrsta heimsmeistaratitil. Toto segist ekki ætla að mæta á hátíðina og staðfesti að það mun Hamilton heldur ekki gera. ,,Ég mun ekki vera þar sökum tryggð minnar við Hamilton."

GettyImages

Hvað gerðist?

Hamilton og Verstappen voru jafnir að stigum fyrir lokakeppni Formúlu 1 tímabilsins í Abu Dhabi. Atvik sem átti sér stað undir lok keppninnar hefur skipt kappakstursáhugamönnum í tvennt. Eftir að Nicholas Latifi, ökumaður Williams, klessti bíl sinn innan brautar þurfti að kalla út öryggisbíl. Lengi vel leit út fyrir að keppnin myndi enda fyrir aftan öryggisbílinn en hann var kallaður inn fyrir lokahring keppninnar.

Fyrir það hafði hringuðum bílum fyrir aftan öryggisbílinn verið skipað að halda sig fyrir aftan öryggisbílinn þar sem að þeir voru staðsettir á milli Hamilton sem var í fyrsta sæti og Verstappen sem var í öðru sæti.

Keppnisstjórnendur ákváðu hins vegar að breyta ákvörðun sinni og leyfðu þeim bílum sem voru hring á eftir forystusauðunum að afhringa sig. Frá þeirri stundu varð ljóst að Hamilton ætti erfitt uppdráttar þar sem að Verstappen var á mun betri dekkjagangi. Svo fór að hann tók framúr Hamilton og tryggði sér sigur í stigakeppni ökumanna.

Max Verstappen, hrósaði sigri eftir helgina
GettyImages

Eftirmálar

Mercedes sendi frá sér yfirlýsingu eftir keppnina á sunnudaginn þar sem að liðið sagðist hafa það í hyggju að áfrýja niðurstöðu ráðsmanna Formúlu 1 eftir kappaksturinn í Sádí-Arabíu.

Forráðamenn Mercedes höfðu átt fund með ráðsmönnum Formúlu 1 þar sem að þeir mótmælti ákvörðun ráðsmanna og að þeim hafi fundist tvær reglugerðir hafa verið brotnar í ákvörðun ráðsmanna Formúlunnar um að leyfa hringuðum bílum að afhringasig undir lok keppninnar á bak við öryggisbíl.

Í dag var það hins vegar staðfest að Mercedees myndi ekki áfrýja niðurstöðu ráðsmanna. Ávörðun Mercedes um að áfrýja ekki staðfestir þá staðreynd að Max Verstappen er ríkjandi heimsmeistari í Formúlu 1. Hann fær titilinn afhentan við hátíðlega athöfn í París í kvöld.

,,Í samráði við Lewis Hamilton höfum við íhugað vandlega þá atburði sem áttu sér stað í lokakeppni Formúlu 1 tímabilsins. Við hvívetna haft ást okkar fyrir íþróttinni í fyrirrúmi og trúum því að allar keppnir eigi að sigrast á eigin verðleikum. Í síðustu keppni fannst mörgum, þar með talið okkur að það hvernig hlutirnir þróuðust hafi ekki verið réttlátt. Ástæðan fyrir því að við mótmæltum úrslitum keppninnar á sunnudaginn var sú að reglum um öryggisbíla var beitt á nýjan hátt sem hafði áhrif á úrslit keppninnar, eftir að Lewis hafði verið í forystu og á leiðinni að vinna heimsmeistaratitilinn," sagði meðal annars í yfirlýsingu frá Mercedes sem birtist í dag.