Aron Guðmundsson
Laugardagur 13. ágúst 2022
09.00 GMT

Miklar breytingar hafa átt sér stað á forystu körfuknattleiksdeildar KR milli tímabila. Böðvar Guðjónsson, sigursælasti formaður í sögu deildarinnar hjá KR, hefur látið af störfum og í hans stað er Vesturbæingurinn Ellert mættur. Eftir nokkkrar vikur í embætti er hann bjartsýnn á framhaldið hjá KR.

„Það er eins með þetta og allt nýtt sem maður tekur að sér að það tekur tíma að koma sér inn í málin og það er í mörg horn að líta hér hjá KR,“ segir Ellert við Fréttablaðið.


Ef við náum að virkja KR-fjölskylduna í því sem við erum að gera þá eru okkur allir vegir færir


„Stjórnin hjá okkur er vel samsett af fólki sem hefur verið í stjórn áður, bæði stjórnarmenn sem voru í síðustu stjórn og aðrir sem voru í stjórninni þar áður. Þannig að hér er fólk sem hefur reynslu af þeim hlutum sem ganga þarf í innan deildarinnar. Ég sé fram á virkilega gott samstarf okkar á milli og til þess að við náum að tækla öll þau verkefni sem við stöndum frammi fyrir þurfum við að viðhalda góðri verkaskiptingu okkar á milli.“

Ellert Arnarsson, formaður körfuknattleiksdeildar KR

Kunnugur staðháttum

Þó svo að Ellert sé nýr í embætti formanns er hann KR-ingum vel kunnugur. Hann þekkir félagið út og inn, Vesturbæingur í húð og hár.

„Ég er uppalinn Vesturbæingur og KR-ingur, spilaði upp alla yngri flokkana með KR í körfunni alveg upp í meistaraflokk og hef því ekki langt að sækja ást mína á félaginu. Svo á ákveðnum tímapunkti ákvað ég að halda í víking og tók meðal annars eitt tímabil með Hamri í Hveragerði sem og ÍR í Breiðholti áður en ég kallaði þetta gott. Þrátt fyrir tíma minn frá KR fylgdist maður alltaf vel með félaginu. Ég var í árgangi með KR-sleggjum í körfuboltanum, þeim Brynjari Þór Björnssyni og Darra Hilmarssyni. Þeir héldu áfram að spila með félaginu og unnu þarna titla með karlaliðinu á þessum ótrúlegu tímum þegar liðið vann sex Íslandsmeistaratitla í röð.“

En hvernig er það að vera mættur í jafn stórt og veigamikið embætti líkt og formannsembættið hjá KR í körfuboltanum er?

„Mér finnst þetta frábært og ég er mjög þakklátur fyrir það traust sem mér er gefið í að koma þarna inn og taka við formennskunni. Á sama tíma er það mjög jákvætt fyrir mig að geta stigið þarna inn og gefið aðeins til baka til félagsins sem gaf mér á sínum tíma tækifæri og ól mann líka að einhverju leyti upp.“

Ellert segir hins vegar að það hafi ekki verið tilfellið að hann hafi hoppað beint á embættið um leið og það bauðst.

„Auðvitað þurfti maður að hugsa sig um áður en maður stökk á þetta. Það er mikil skuldbinding fólgin í þessu embætti, fyrst og fremst í tíma, en ef stjórnin er samhent og við náum að virkja KR-fjölskylduna í því sem við erum að gera þá eru okkur allir vegir færir.“

Sigurhefðin sterk

Ellert tók, eins og áður sagði, við formennskunni af Böðvari Guðjónssyni sem hafði verið viðloðandi starfið hjá körfuknattleiksdeild KR frá árinu 2005. Fyrst sem stjórnarmaður en síðan sem formaður deildarinnar. Böðvar kvaddi félagið sem sigursælasti formaður sögunnar hjá körfuknattleiksdeild KR og er þá einna helst hægt að minnast á ótrúlega sigurgöngu karlaliðs KR frá 2014 til 2019.

„Við Böðvar höfum þekkt hvor annan nokkuð lengi,“ segir Ellert. „Hann er náttúrulega búinn að vera viðloðandi körfuboltann hjá KR svo ótrúlega lengi. Ég kynntist honum fyrst í kringum þann tíma sem hann var að koma fyrst inn í þetta. Hann hefur boðist til þess að rétta mér hjálparhönd ef ég leitast eftir því og ég mun klárlega reyna að nýta mér þá þekkingu og reynslu sem hann býr yfir á einhverjum tímapunkti. Við höfum nú þegar átt góð samtöl um starfið.“

Hins vegar gat sigurganga karla­liðs KR ekki haldið áfram endalaust. Liðið varð síðast Íslandsmeistari árið 2019

„Það er í raun magnað hvað þessi sigurganga teygði sig yfir langan tíma. Það verða ákveðin kynslóðaskipti í liðinu, áttatíu og tvö árgangurinn dettur þarna út á einum tímapunkti, árgangurinn sem hafði spilað lengi hjá félaginu og verið á bak við þessa titla. Það er reyndar gott framhald af því að vera komin með Helga Má Magnússon og Jakob Örn í þjálfarateymið hjá liðinu núna.“

Ellert segir eðlilegt að slíkar breytingar verði á liðum, kynslóðaskipti.

„Nú er tækifæri fyrir okkur til þess að keyra áfram á nýrri kynslóð og að einhverju leyti nýjum áherslum. Ég tel að það séu mjög spennandi tímar fram undan hjá liðinu. Jú, við getum sagt sem svo að við séum í ákveðnum uppbyggingarfasa en KR kappkostar alltaf að vera í fremstu röð og við höfum mikinn metnað fyrir því. Við munum alltaf tefla fram sterku og góðu liði sem getur gert góða hluti, samhliða því að byggja upp yngri KR-inga. Þetta tvennt getur alveg haldist í hendur.“

Hjá KR er hefðin sú að berjast um þá titla sem eru í boði og þá skiptir ekki máli í hvaða grein er sótt fram. Kvennalið KR í körfunni er sögulega séð mjög sigursælt en árangurinn hefur látið á sér standa undanfarin ár.

KR varð síðast Íslandsmeistari í kvennaflokki í körfubolta árið 2010. Nú leikur liðið í næstefstu deild en það er hugur í fólki í Vesturbænum.

„Við erum mjög spennt fyrir meistaraflokki kvenna, bæði fyrir næsta tímabil og tímabilin þar á eftir. Það er ákveðin uppbygging að eiga sér stað þar líka og við búum yfir nokkrum ungum og spennandi leikmönnum sem hafa spilað með yngri landsliðum Íslands, sem við byggjum liðið í kringum. Það er mjög spennandi vegferð í gangi þar líka.“

Aðstaðan bætt

Fram undan er mikil uppbygging á þeirri aðstöðu sem KR býr við þessa dagana. Nýtt deiliskipulag fyrir KR-svæðið svokallaða í Vesturbæ Reykjavíkurborgar var samþykkt á fundi borgarráðs í síðasta mánuði. Í hinu nýja deiliskipulagi felast meðal annars markmið um að bæta aðstöðu KR til íþrótta- og félagsstarfsemi með byggingu íþrótta- og þjónustubygginga. Ellert telur að bætt aðstaða muni klárlega verða til þess að lyfta starfi KR á næsta stig.

„Þetta er allt í þróun á þessari stundu, við erum með fulltrúa frá körfuknattleiksdeildinni í byggingarnefnd svæðisins og eins og maður hefur séð frá öðrum stöðum þar sem farið hefur verið í uppbyggingu á aðstöðu þá virðist þróunin vera sú að þegar þú lyftir aðstöðunni upp á næsta stig þá lyftirðu um leið ansi mörgu með þér.“

En hvaða framtíðarsýn hefur hann fyrir körfuknattleiksdeildina hjá KR?

„Það sem við viljum gera er að halda áfram að byggja á því góða starfi sem hefur verið unnið undanfarin ár. Hlúa að og leggja mikinn fókus á yngri flokkana hjá okkur, við ætlum okkur að vinna gott starf þar því þar verður þetta allt til. Þar er uppsprettan og grunnurinn.Þannig hafa titlarnir komið til okkar og við viljum halda því áfram. Við viljum að það starf sé í ákveðnum takti við meistaraflokkana hjá okkur. Góður árangur meistaraflokkanna býr til byr í seglin fyrir yngri leikmenn félagsins og þá fáum við góða árangurshringrás með metnaðinn sem býr að baki því að vilja vera í fremstu röð.“

Athugasemdir