Arnar Þór viðraði pælingar sínar um breytta nálgun á því hvernig utanumhald og fyrirkomulag yrði við æfingar hjá yngri landsliðum Íslands í útvarpsþætti Fótbolta.net á X-inu 977 um síðustu helgi.

Knattspyrnuáhugamenn og þá kannski aðallega þeir sem lifa og hrærast í knattspyrnu og starfa í félögunum hafa rætt og skipst á skoðunum um vangaveltur Arnars Þórs. Fréttablaðið fékk Arnar Þór til þess að útskýra á nánari hátt hugmyndafræði sína og samstarfsmanna sinna en honum gafst ráðrúm til þess að gera í fyrrgreindum útvarpsþætti.

„Það sem er mikill kostur að mínu mati við það að ég hafi verið ráðinn í þetta starf er að ég hef starfað í Belgíu undanfarna tvo áratugi um það bil. Af þeim sökum þekki ég knattspyrnuumhverfið hér heima ekkert og þekki ekki náið þá sem starfa innan knattspyrnuhreyfingarinnar á Íslandi. Af þeim sökum kem ég með ferskan koll til leiks og hugmyndir sem eru mögulega öðruvísi en hjá þeim sem hafa stýrt málum hér síðustu árin,“ segir Arnar Þór í samtali við Fréttablaðið.

Erum aftarlega á merinni á ýmsum sviðum í þjálfun

„Ég hef tekið fyrstu tvo mánuðina rúma í það að skoða landslagið, kynna mér hlutina og skoða það hvernig félögin starfa. Það sem kemur mér mest á óvart er hversu lítið hefur breyst þessa tvo áratugi um það bil sem ég hef verið í burtu og hversu aftarlega við erum á vissum sviðum við þjálfun knattspyrnu. Belgarnir fóru í ákveðna naflaskoðun með alla sína þjálfun og mótamál fyrir 20 árum og mér finnst við þurfa að gera það sama núna,“ segir þessi fyrrverandi landsliðsmaður enn fremur.

„Það sem ég á við þar er að við þurfum að auka tempóið á æfingum félagsliða á öllum aldursstigum og þá sérstaklega eftir 13-14 ára aldur og allra yngri landsliðanna. Mér finnst að það eigi að spila án þess að taka innköst með höndunum, markvörður megi rekja boltann frá marki sínu þegar spilað er og fleiri atriði í þeim dúr sem auka hraða og ákefð í leikjum,“ segir hann til nánari útskýringar.

„Þá finnst mér að leikmenn í öllum flokkum eigi að spila með reglulegra millibili, það er alla jafna einn leik í hverri viku yfir allt árið með hæfilega löngum fríum um hátíðir og á sumrin. Leikmenn læra mest og hafa mest gaman af því að spila við önnur lið.

Þá spila Belgar til dæmis í aldursflokknum sem samsvarar 5. flokki hér heima 3x25 á meðan við spilum 2x20. Með því að spila í fleiri leikhlutum gefur það þjálfurum í fyrsta lagi fleiri tækifæri til þess að hrósa fyrir það sem vel er gert og laga það sem aflaga fer. Þá fá leikmenn lengri tíma til þess að þróa sinn leik og bæta sig meira í hverjum leik fyrir sig,“ segir hann.

Ekki að fara að skipa félögum fyrir um það hvernig þau starfa

„Það er samt mikilvægt að hafa í huga að þetta er bara mín skoðun á því hvernig gera eigi hlutina og ég get ekki þvingað félögin til þess á vinna á þennan hátt. Það eina sem KSÍ getur gert er að leiðbeina um að þetta sé góð leið til þess að ná framförum á þjálfaranámskeiðum. Svo get ég viðrað þessa skoðun mína ef hennar er óskað hjá þjálfurum félaganna. Markmið mitt er ekki að stýra því hvernig félög starfa heldur frekar gefa ráð sem ég tel heillavænleg,“ segir Arnar sem auk þess að vera yfirmaður knattspyrnusviðs er þjálfari U-21 árs landsliðsins.

Hann vill breyta nálgun, vinnuumhverfi og verklagi við æfingar yngri landsliðanna og ákveðið hefur verið að hrinda vangaveltum hans og samstarfsmanna hans í framkvæmd í október á næsta ári.

„Við erum með margar hugmyndir í kollinum sem hafa það að leiðarljósi að bæta umhverfið. Einni af þeim sem eru komnar á teikniborðið og verður hrint í framkvæmd er að breyta því hvernig yngri landsliðin æfa.

Fyrir það fyrsta ætlum við að fjölga æfingum á árinu úr 15 í 25 án þess að fjölga þeim gluggum þar sem leikmenn koma á landsliðsæfingar. Yngri landsliðin munu æfa í tveimur gluggum á hverju skólamisseri og æfa á virkum dögum í stað þess að æfa um helgar. Við munum vinna í samstarfi við skólakerfið og það er skilyrði af okkar hálfu að leikmenn séu að standa í stykkinu í skólanum ætli þeir að vera valdir,“ segir Arnar Þór.

Æfa á öðrum tímum en áður

„Kvennalandsliðin æfa á þeim tímum þar sem A-landsliðin eru að spila fyrir keppnistímabilið og af þeim sökum þarf ekki að fresta leikjum í meistaraflokki vegna landsliðsæfinga. Liðin æfa í tvo til þrjá daga í senn og taka um það bil fimm æfingar á þeim tíma sem við erum saman.

Þannig væri til dæmis týpískur dagur með einni tempóæfingu um morguninn, hádegismat og mögulega fyrirlestri og svo rólegri æfingu síðdegis. Með þessu fá leikmenn meira út úr hverri æfingu fyrir sig og þurfa ekki að sleppa leikjum með félagsliðum sínum,“ segir hann um fyrirkomulag landsliðsæfinganna.

„Það er svo þannig að hugmyndin er hvorki að umbylta kerfinu eða fara í stríð við félögin um leikmenn þeirra. Við erum einfaldlega að færa æfingarnar, skerpa á því hvernig er æft og bæta æfingarnar sjálfar.

Þjálfarar fá að vita það fyrir fram hvenær þessir fimm gluggar og önnur verkefni landsliðanna fara fram og meti þjálfarar meistaraflokksliða það sem svo að það sé betra að leikmenn séu hjá sér og spili leiki með félagsliðum í stað landsliða þá þvingum við ekki félögin til þess að láta leikmennina af hendi. Við vinnum þetta í nánu og góðu samstarfi og það hefur gengið vel hingað til og mun gera það áfram trúi ég,“ segir Arnar sem vill slá á áhyggjuraddir félagsliðaþjálfaranna ef einhverjar eru.