Nýtt tímabil hefst hjá atvinnukylfingnum Valdísi Þóru Jónsdóttur úr GL í dag þegar hún hefur keppni á Fatima Bink Mubarak mótinu. Þetta er fyrsta mót tímabilsins í Evrópumótaröðinni, næststerkustu mótaröð heims, sem Valdís Þóra hefur leikið á undanfarin ár og fer mótið fram í Abú Dabí í Sameinuðu arabísku furstadæmunum.

Á mótinu leika kylfingar með áhugakylfingum frá svæðinu og hefur Valdís Þóra leik klukkan 8.42 að morgni til að íslenskum tíma. Er þetta í annað skiptið sem Valdís tekur þátt í þessu móti en henni tókst ekki að komast í gegnum niðurskurðinn árið 2017.

Hnökrar voru á undirbúningi Valdísar fyrir mótið þar sem kylfurnar skiluðu sér ekki með henni í fyrstu frá London. Eftir nokkurra daga bið komust þær á leiðarenda og náði hún að æfa síðustu dagana fyrir mót.