Tiger Woods fór holu í höggi í fyrsta sinn síðan 1998 þegar hann tók æfingarhring með Fred Couples um síðustu helgi.

Um var að ræða 193 metra par 3 holu á Madison-golfvellinum í La Quinta í Kaliforníu þegar Tiger var að hita upp fyrir Einvígið gegn Phil Mickelson.

Þrátt fyrir að vera einn af sigursælustu kylfingum allra tíma og að margra mati sá besti í sögu golfsins hefur Tiger ekki verið duglegur að fara holu í höggi.

Tókst honum það síðast í International-mótinu í Colorado í ágúst 1998 og voru því rúmlega tuttugu ár á milli.

Sonur Tiger, Charlie Axel Woods, var með honum á vellinum þennan daginn og sá því pabba sinn fara holu í höggi.

Tiger er þessa dagana að undirbúa sig fyrir Hero World Challenge-mótið á Bahama-eyjum, árlegt styrktarmót fyrir góðgerðarfélag Tiger þar sem átján bestu kylfingar heims mæta til leiks.