Tiger Woods mun enn á ný reyna fyrir sér á hæsta stigi golf­í­þróttarinnar og snúa aftur á at­vinnu­manna­mót rúmu hálfu ári eftir að hann gerði slíkt hið sama. Tiger, sem er orðinn 47 ára, er ekki bara mættur til þess að taka þátt. Að hans eigin sögn skráir hann sig aldrei til leiks á móti nema með þá hugsun að stefna að sigri.

Um hálft ár er liðið síðan Tiger Woods tók þátt í móti á at­vinnu­manna­stigi en í dag stígur hann aftur inn á golf­völlinn og hefur leik á Genisis Invita­tional mótinu sem er hluti af PGA-móta­röðinni.

Margir héldu að at­vinnu­manna ferli Tiger, sem er talinn besti kylfingur sögunnar, væri lokið eftir að hann lenti í al­var­legu bíl­slysi árið 2021 þar sem læknar í­huguðu um stund að fjar­lægja á honum einn fótinn.

Allt kom þó fyrir ekki, Tiger lagði hart að sér í endur­hæfingunni og sneri aftur á völlinn á at­vinnu­manna­stigi. Nú er liðið hálft ár síðan að hann tók þátt á Opna breska meistara­mótinu og enn á ný ætlar Tiger að reyna spila til sigurs.

„Ég myndi ekki stíga fram og keppa á móti þessum kylfingum ef ég teldi mig ekki geta unnið þá,“ sagði Tiger á blaða­manna­fundi fyrir Genesis mótið en á mótinu taka margir af bestu kylfingum heims þátt.

Tiger hefur unnið 15 ris­a­titla á sínum ferli, síðasti sigur hans kom í októ­ber árið 2019 og þó svo að Tiger hafi náð 47 ára aldri telur hann ekki réttu stundina núna að láta gott heita.

„Ég er hér til þess að ná í sigur. Okey? Það að ná bara í gegnum niður­skurð er ekki frá­bært fyrir mig,“ í­trekaði Tiger og bætti við. „Ef ég mæti til leiks á mót, þá er það alltaf til þess að reyna næla í sigur.

Það mun koma að þeim tíma­punkti að líkami minn gerir mér það ekki kleift lengur, það mun lík­legast verða raunin fyrr en seinna. En að hugsa frekar um að verða sendi­herra í­þróttarinnar og halda mér bara inn á vellinum með þessum kylfingum er ekki hugsun sem ég viður­kenni í huga mínum, það er ekki hluti af erfða­efni mínu.“