Lögreglan í Manchester gat ekki gefið upplýsingar um stöðuna á rannsókn málsins þegar Fréttablaðið leitaði svara hjá yfirvöldum þar í morgun. Gylfi er laus gegn tryggingu til 16. október samkvæmt enskum miðlum. Sá möguleiki er fyrir hendi að rannsókn málsins haldi áfram og að Gylfi verði laus gegn tryggingu í lengri tíma. Ættu slíkar upplýsingar að liggja fyrir í þessari viku.

Að rannsókn lokinni verður málið fellt niður eða gefin út ákæra. Verði gefin út ákæra fer málið fyrir dómstóla þar í landi en slíkt ferli getur tekið marga mánuði. Gylfi er í farbanni á meðan lögreglan rannsakar málið en fyrst um sinn dvaldi hann í öryggishúsnæði í Manchester.

Gylfi var handtekinn um miðjan júlí og nokkrum dögum síðar rataði nafn hans í íslenska fjölmiðla. Málið hefur síðan þá verið til rannsóknar en Gylfi hefur gengið frjáls ferða sinna á Bretlandseyjum.

Keane-og-Gylfi-Þór.jpg

16. júlí: Gylfi Þór handtekinn í Manchester

Föstudaginn 16. júlí var Gylfi handtekinn af lögreglunni í Manchester vegna gruns um kynferðisbrot gegn ólögráða einstaklingi. Eftir skýrslutöku hjá lögreglunni var Gylfi látinn laus gegn tryggingu. Tvær vikur eru eftir af tímanum sem kveðið var upp um að Gylfi væri laus gegn trygging

17. júlí: Samfélagsmiðlar byrja að slúðra

Netverjar gera því í skóna á samfélagsmiðlum að Gylfi Þór Sigurðsson hafi verið handtekinn af lögreglunni í Manchester vegna gruns um kynferðisbrot gegn barni. Húsleit hafi verið gerð á heimili Gylfa Þórs samhliða handtökunni. Gylfi Þór lék ekki með Everton í æfingaleik þá helgi

19. júlí: Settur í leyfi hjá félagsliði sínu, Everton

Everton staðfestir að leikmaður liðsins hafi verið settur í ótímabundið leyfi hjá félaginu vegna lögreglurannsóknar. Skömmu síðar greinir Everton frá því að um sé að ræða 31 árs gamlan leikmann liðsins. Hringurinn þrengdist síðan enn frekar þegar Fabian Delph sagði að hann væri ekki umræddur leikmaður. Þá var Gylfi eini leikmaðurinn sem gat komið til greina í leikmannahópi liðsins.

20. júlí: Nafnið birt í íslenskum fjölmiðlum

Íslenskir fjölmiðlar segja frá því að Gylfi Þór sé til rannsóknar hjá lögreglunni í Manchester vegna kynferðisbrots gegn barni. Gylfi Þór hefur ekkert tjáð sig um ásakanir í sinn garð. Breskir fjölmiðlar vitna í þá íslensku hvað nafngreininguna varðar. Ekkert hefur skýrst meira í málinu síðan þá.

11. ágúst: Málið ennþá til rannsóknar

Lögreglan í Manchester staðfestir að mál Gylfa Þórs sé enn til rannsóknar hjá embættinu. Rætt hafði verið um að hann myndi mæta fyrir dómara 12. eða 13. ágúst en ekkert varð úr því. Næsta dagsetning í málinu er þá 16. október.

25. ágúst: Ekki í landsliðshópnum

Arnar Þór Viðarsson og Eiður Smári Guðjohnsen tilkynna landsliðshóp sinn fyrir komandi leiki í undankeppni HM 2022. Gylfi Þór er ekki í leikmannahópnum og Arnar Þór segist ekki hafa rætt við Gylfa Þór síðan hann var handtekinn. Á fimmtudaginn síðastliðinn var svo sömu sögu að segja. Gylfi Þór var ekki valinn í næstu leiki liðsins gegn Armeníu og Liechtenstein sem spilaðir verða á Laugardalsvelli í október. Arnar Þór hefur ekki verið í sambandi við hann síðustu vikurnar

11. september: Ekki í hópnum hjá Everton

Everton sendir frá sér staðfestingu á leikmannahópi liðsins fyrir komandi keppnistímabil í ensku úrvalsdeildinni 1. september og var hópurinn birtur á vefsíðu félagsins laugardaginn 11. september. Þar er nafn Gylfa Þórs ekki að finna á meðal leikmanna í hópi liðsins. Þar af leiðandi liggur fyrir að hann muni ekki spila með félagsliði sínu fyrr en í upphafi næsta árs í fyrsta lagi.