Landsliðskonan í handbolta, Thea Imani Sturludóttir, hefur skrifað undir samning við Val sem gildir út tímabilið 2024.

Thea kemur til liðsins frá Aarhus í Danmörku en hún lék áður með Oppsal HK í Noregi og Fylki. Thea hefur spilað fyrir yngri landslið Íslands ásamt A-landsliðinu undanfarin ár en hún er fædd árið 1997.

„Thea er góð viðbót við okkar leikmannahóp. Hún getur bæði leikið sem skytta og horn ásamt því að vera góð í vörn. Hún er á góðum aldri með fína reynslu en um leið getur ennþá bætt sig sem leikmaður," sagði Ágúst Þór Jóhannsson, þjálfari Valsliðsins, við undirskriftina í dag.

Valur fær Stjörnuna í heimsókn í Origo-höllina í fjórðu umferð Olísdeildarinna á laugardaginn en liðin hafa, líkt og Fram, fjögur stig eftir þrjár umferðir deildarinnar. ÍBV er hins vegar á toppnum með fimm stig.