Það er mat sérfræðinga í hlaðvarpsþættinum Dr. Football að það séu litlar sem engar líkur á því að Aron Einar Gunnarsson, fyrrum landsliðsfyrirliði íslenska landsliðsins í knattspyrnu gefi kost á sér í landsliðið í næsta mánuði verði hans starfskrafta óskað.

Tæpt ár er síðan Aron Einar var síðast hluti af landsliðshópi íslenska landslðisins en síðast haust var lögð fram kæra á hendur honum og Eggert Gunnþóri Jónssyni, leikmanni FH. Hérðassaksóknari felldi málið niður í síðustu viku og í Fréttablaðinu í vikunni lét Vanda Sigurgeirsdóttir formaður KSÍ hafa eftir sér að Arnar Þór Viðarsson gæti valið Aron Einar í landsliðið á ný.

Næsta verkefni landsliðsins fer fram í júní og er þar um að ræða leiki í Þjóðadeild UEFA sem og æfingaleik gegn San Marínó.

„Ég held að það sé ekki séns," sagði sérfræðingurinn, Hrafnkell Freyr Ágústsson þegar hann var spurður út í það hvort hann teldi að Aron Einar myndi gefa kost á sér í landsliðið myndi Arnar Þór falast eftir því.

Að sama skapi töldu sérfræðingar Dr. Football, þeir Hrafnkell, Albert Brynjar Ingason og Hjörvar Hafliðason að Guðlaugur Victor Pálsson, Alfreð Finnbogason, Jóhann Berg Guðmundsson og Sverrir Ingi Ingason myndu ekki gefa kost á sér í landsliðið á næstunni.