Sveinn Arnarsson, knattspyrnudómari og fjórði dómari í leik KA og KR í Bestu deild karla á dögunum hefur nú gefið frá sér yfirlýsingu eftir viðtal sem birtist við Arnar Grétarsson í hlaðvarpsþættinum Þungavigtin í dag. Sveinn segir að degi eftir leik hafi hann og Arnar mæst í KA heimilinu þar sem Arnar hafi látið orð falla í hans garð „sem voru alls ekkert kurteisishjal."

Arnar Grétarsson, þjálfari knattspyrnuliðs KA tjáði sig í fyrsta skipti um fimm leikja bann sem hann fékk í kjölfar leiks KA og KR í Bestu deildinni. Arnar var í viðtali í hlaðvarpsþættinum Þungavigtinni þar sem hann segist hafa farið yfir strikið og að degi eftir leik KA og KR hafi hann vísað Sveini út úr KA-heimilinu þar sem honum finnist hann bara hafa verið að strá salti í sárin.

„Ég held ég hafi ekki notað einhver ljót orð en auðvitað var mér enn heitt í hamsi,“ sagði Arnar í viðtali í Þungavigtinni. Hann er á því að Sveinn hefði átt að lesa betur í aðstæður þarna en þennan dag var hann að koma með barn sitt á æfingu hjá KA.

Sveinn segir það hins vegar alrangt í yfirlýsingu sem hann gaf út á samfélagsmiðlum í dag að hann hafi verið að strá salti í sár Arnars. Degi eftir leik KA og KR hafi hann fengið skilaboð frá framkvæmdarstjóra KA, Sævari Péturssyni sem bað hann afsökunar á því sem hafði gerst á síðustu andartökum leiksins sem og eftir leik.

Hann (Sveinn) segist hafa tekið afsökunarbeiðninni og spurt á móti hvort hann gæti hitt á Sævar sem svaraði því þannig að Sveinn mætti endilega líta við.

„Ég á barn, tíu ára dreng, sem æfir knattspyrnu með KA. Í hádeginu, þriðja ágúst, daginn eftir umræddan knattspyrnuleik fer ég með barn mitt á knattspyrnuæfingu. Aðstoðaði ég hann í anddyri félagsheimilis liðsins við að klæða sig í knattspyrnuskó og hnýta skóþveng sinn þar sem virkilega kalt var í veðri og barnið loppið á fingrum. Ég náði mér því næst í kaffibolla og þar næst gáði ég hvort framkvæmdastjórinn væri við.

Á þeim tíma kom þjálfari KA að mér. Þau orð sem þar voru látin falla í minn garð voru alls ekki neitt kurteisishjal. Hegðun sem þessi, bæði á knattspyrnuvelli og sér í lagi daginn eftir leik, er ekki íslenskri knattspyrnu til framdráttar. Það er því alrangt að ég hafi á nokkurn hátt verið að strá salti í sár nokkurs manns. Ég einfaldlega tók við afsökunarbeiðni og mælti mér mót við frkv.stjóra áður en ég ætlaði að horfa á barn mitt æfa knattspyrnu."

Sveinn segir að menn verði að taka ábyrgð á eigin hegðun með öðrum hætti en að gera það tortryggilegt að hann hafi verið í KA-heimilinu degi eftir leik KA og KR. „Þegar ég kom þangað annars vegar með son minn á æfingu og hins vegar til að hitta á frkv. stjóra félagsins, sem getur staðfest það.

Við erum komin á mjög skringilegar slóðir ef umræða um íslenska knattspyrnu hverfist um 38 ára fjölskylduföður á Akureyri. Íslensk knattspyrna er í sókn og fagmennskan verður æ meiri með hverju árinu. Látum hér staðar numið og beinum sjónum okkar fram veginn, íslenskri knattspyrnu til heila. Læt ég þetta vera mín lokaorð um málið."

Yfirlýsing Sveins:

Að gefnu tilefni. Ég í sannleika sagt hélt að ég þyrfti ekki að skrifa þennan texta en vegna þeirra ummæla sem hafa fallið sé ég mig knúinn til að útskýra ákveðna hluti.

Morgun eftir leik í 15. umferð bestu deildar karla fékk ég skilaboð frá framkvæmdastjóra KA þar sem hann biður mig afsökunar á því sem gerðist á síðustu andartökum leiksins og eftir leik. Ég tók þeirri afsökunarbeiðni og spurði hvort ég gæti hitt á hann. Hann sagði við mig að líta endilega við.

Ég á barn, tíu ára dreng, sem æfir knattspyrnu með KA. Í hádeginu, þriðja ágúst, daginn eftir umræddan knattspyrnuleik fer ég með barn mitt á knattspyrnuæfingu. Aðstoðaði ég hann í anddyri félagsheimilis liðsins við að klæða sig í knattspyrnuskó og hnýta skóþveng sinn þar sem virkilega kalt var í veðri og barnið loppið á fingrum. Ég náði mér því næst í kaffibolla og þar næst gáði ég hvort framkvæmdastjórinn væri við.

Á þeim tíma kom þjálfari KA að mér. Þau orð sem þar voru látin falla í minn garð voru alls ekki neitt kurteisishjal. Hegðun sem þessi, bæði á knattspyrnuvelli og sér í lagi daginn eftir leik, er ekki íslenskri knattspyrnu til framdráttar. Það er því alrangt að ég hafi á nokkurn hátt verið að strá salti í sár nokkurs manns. Ég einfaldlega tók við afsökunarbeiðni og mælti mér mót við frkv.stjóra áður en ég ætlaði að horfa á barn mitt æfa knattspyrnu.

Menn verða að taka ábyrgð á eigin hegðum með öðrum hætti en að gera það eitthvað tortryggilegt að ég sé í KA-heimilinu daginn eftir leik, þegar ég kom þangað annars vegar með son minn á æfingu og hins vegar til að hitta á frkv. stjóra félagsins, sem getur staðfest það.

Við erum komin á mjög skringilegar slóðir ef umræða um íslenska knattspyrnu hverfist um 38 ára fjölskylduföður á Akureyri. Íslensk knattspyrna er í sókn og fagmennskan verður æ meiri með hverju árinu. Látum hér staðar numið og beinum sjónum okkar fram veginn, íslenskri knattspyrnu til heila. Læt ég þetta vera mín lokaorð um málið.