Svava Rós Guðmundsdóttir, sóknarmaður íslenska landsliðsins, gekk í raðir NJ/NY Gotham í Bandaríkjunum á dögunum. Hún var búin að afþakka tilboð frá Bandaríkjunum fyrr á ferlinum en var ákveðin í að stökkva á tækifærið ef það byðist í þetta skiptið.
Á dögunum kom upp orðrómur um að Svava hefði fallið á læknisskoðun hjá West Ham en hún segir það ekki rétt.
„Við fórum út og þegar við komum á svæðið var samningurinn ekki eins og búið var að semja um áður en ég fór út. Það var búið að breyta samningnum um það leyti sem Gotham kom aftur inn í myndina og þá afþakkaði ég boð West Ham þótt samningurinn stæði enn til boða.“
Hjá Gotham mun Svava leika undir stjórn Juan Carlos Amorós sem hún segir að hafi áður sýnt sér áhuga.
„Þjálfarinn á stóran þátt í þessu, enda hefur hann hefur reynt áður að fá mig til sín. Ég er búin að tala mikið við hann og er hrifin af því hvernig hann vill spila fótbolta og var í miklum samskiptum við hann. Ég er mjög spennt að vinna með honum enda gerði hann frábæra hluti með Houston Dash seinni hluta síðasta tímabils.“
Liðið varð meistari á fyrsta tímabili sínu árið 2009 en olli vonbrigðum á síðasta ári þegar Gotham lenti í neðsta sæti deildarinnar.
„Liðið er að vinna í endurnýjun. Það er komið nýtt þjálfarateymi og fjölmargir nýir leikmenn. Það er verið að byggja upp liðið með háleit markmið sem er spennandi.“
