Fótbolti

Lyginni líkast að vera kominn upp að hlið Guðna

Birkir Már komst um helgina upp að hlið Guðna Bergssonar í 4. sæti yfir flesta landsleiki fyrir hönd Íslands. Eiður Smári og Hermann eru ekki langt undan en hann kveðst vera sáttur við að vera nefndur í þessu samhengi.

Birkir Már fékk iðulega góða hjálp en hélt Angel Di Maria í vasanum allan leikinn gegn Argentínu um helgina. Fréttablaðið/Getty

Bakvörðurinn Birkir Már Sævarsson komst í góðra manna hóp um helgina er hann lék 80. landsleik sinn fyrir hönd Íslands í 1-1 jafntefli við Argentínu í Moskvu.

Með því komst hann upp að hlið formanns KSÍ, Guðna Bergssonar, í 4. sæti yfir flesta landsleiki fyrir hönd karlaliðs Íslands.

Aðeins þrír leikmenn eiga fleiri leiki, Rúnar Kristinsson er enn leikjahæstur með 104 leiki en Hermann Hreiðarsson (89) og Eiður Smári Guðjohnsen (88) eiga enn nokkra leiki á Birki.

Liðsfélagar hans, Ragnar Sigurðsson og Aron Einar Gunnarsson, eru ekki langt undan með 78 leiki en þeir ná Guðna á meðan á heimsmeistaramótinu stendur spili þeir leikina tvo sem eftir eru í riðlakeppninni. Sjálfur sagðist Birkir ekki hafa gert sér grein fyrir þessu.

„Ég er alveg ótrúlega stoltur að vera hluti af þessum hóp og að heyra af þessu, að ég sé kominn upp að hlið Guðna Bergssonar er lyginni líkast. Ég vissi það í raun ekki,“ sagði Birkir og hélt áfram:

„Maður hugsaði aldrei út í þetta en ég er ótrúlega stoltur af því að heyra þetta. Þetta sýnir hvað maður getur farið langt á mikilli vinnu og metnaði, ég er ekkert hæfileikaríkasti maðurinn á þessu móti en þetta sýnir hvað er hægt að uppskera. Maður er búinn að gefa allt í að bæta sig sem fótboltamaður.“

Hann vildi ekki gefa út nein markmið um hversu hátt hann ætlaði að komast.

„Við sjáum til, ég er bara glaður á meðan ég fæ leiki með þessum hóp, þetta er frábær klúbbur að vera í og ég gæti ekki verið stoltari.“

Hann segir að þeir hafi ekki mikinn tíma til að dvelja við það að hafa náð jafntefli gegn Argentínu.

„Við fórum yfir Argentínuleikinn kvöldið eftir og honum lokað. Þá komum við okkur niður á jörðina og færðum einbeitinguna yfir á næsta leik,“ sagði Birkir en hann fékk það verkefni að stöðva Angel Di Maria, leikmann PSG, sem hefur einnig leikið með Real Madrid og Manchester United.

„Ég upplifði ekki hræðslu í leiknum sjálfum, í aðdraganda mótsins var svolítið yfirþyrmandi að hugsa út í gæði þeirra en þegar komið er inn á völlinn þá hugsar maður bara að þetta sé fótboltaleikur milli tveggja liða, ellefu á móti ellefu,“ sagði Birkir sem hafði Di Maria í vasanum þar til honum var skipt af velli.

„Maður var greinilega að gera eitthvað rétt fyrst hann var tekinn snemma út af,“ sagði Birkir sem fékk ferska fætur inn í stað hans.

„Það er oft erfitt fyrir okkur bakverðina, við fáum ferska fætur inn og þurfum að takast á við það en mér fannst það ganga ágætlega.“

Athugasemdir

Auglýsing
Auglýsing

Tengdar fréttir

Fótbolti

Komið að úr­slita­stundu í Moskvu

Fótbolti

Meðal bestu Evrópuúrslitanna

Fótbolti

Fót­boltinn mögu­lega á leiðinni heim á enska grundu

Auglýsing

Nýjast

Blikar keyrðu yfir FH-inga

Özil hættur: „Þegar við töpum er ég innflytjandi“

KR vann Stjörnuna öðru sinni - Ásgeir með þrennu

Molinari fyrsti Ítalinn sem vinnur risamót í golfi

Birkir Már skoraði sitt fyrsta mark fyrir Val í áratug

Molinari leiðir fyrir lokasprettinn

Auglýsing