Stjórn KSÍ hefur samþykkt að haft sé að leiðarljósi það meginviðmið, þegar mál einstaklinga eru til meðferðar hjá rannsóknar- eða ákæruvaldi og/eða samskiptaráðgjafa, vegna meintra alvarlegra brota að viðkomandi skuli stíga til hliðar í hlutverki sínu hjá KSÍ á meðan meðferð máls stendur yfir.

Þetta var samþykkt á framhaldsfundi sambandsins þann 23. maí síðastliðinn þar sem Vanda Sigurgeirsdóttir, formaður KSÍ kynnti tillögu um viðbragðsáætlun sambandsins og gildir ofangreint jafnt um dómara, þjálfara, leikmenn, forystumenn, starfsmenn og aðra þá sem eru innan KSÍ.

Þessi samþykkt tekur strax gildi. Stjórn KSÍ mun ræða önnur atriði í drögunum áfram og mun jafnframt óska eftir aðkomu laga- og leikreglnanefndar. ,,Stjórn KSÍ leggur mikla áherslu á að vandað sé til verka og að málið sé áfram unnið af ábyrgð, fagmennsku og yfirvegun," segir í yfirlýsingu frá KSÍ.