Steingerður Hauksdóttir synti í dag 50 metra baksund á tímanum 29,43 sekúndur á Evrópumótinu í 50 metra laug sem fram fer í Búdapest í Ungverjalandi þessa dagana.

Steingerður varð þriðja í sínum riðli og lenti í 40. sæti í greininni. Með þessu sundi bætti hún tíma sinn í greininni sem var markmiðið fyrir sundið.

Steingerður synti þessa grein á Íslandsmótinu fyrr á þessu ári á tímanum 29,49 sekúndur en hennar besti tími til þessa er frá síðasta ári þegar hún synti á 29,46.

Í sama riðli, á næstu braut við hliðina á Steingerði, synti Færeyingurinn Signhild Joensen en hún varð fimmta í riðlinum á tímanum 29,64 sekúndur. Signhild er eini færeyski keppandinn á mótinu að þessu sinni og íslenski hópurinn reynir að aðstoða hana eftir bestu getu.

Íslandsmetið í greininni er 28,53 sekúndur en það met er í eigu Ingibjargar Kristínar Jónsdóttur. Ingibjörg Kristín setti það einmitt í Búdapest á heimsmeistaramótinu árið 2017.