Fram kemur í tilkynningu evrópska handknattleikssambandsins, EHF, sem sambandið sendi frá sér í hádeginu í dag að sökum kórónuveirufaraldursins sem gengur yfir heiminn verði keppni i Meistaradeild Evrópu og Evrópubikarsins í karla- og kvennaflokki færð frá apríl og maí fram í sumarið og næsta haust.

Forsvarsmenn EHF hafa ákveðið að hefja leik í fyrrgreindum keppnum í júní og úrslit muni svo ráðast í keppnunum í ágúst í karlaflokki og september í kvennaflokki.

Þannig verði keppt í sextán og átta liða úrslitum í þessum keppnum í júní og úrslitahelgin fer svo fram í Berlín hjá körlunum í lok ágúst og í Búdapest hjá konunum í byrjun september.

Aron Pálmarsson (Barcelona), Guðjón Valur Sigurðsson (PSG), Janus Daði Smárason (Álaborg), Ómar Ingi Magnússon (Álaborg) og Stefán Rafn Sigurmannsson (Pick Szeged) eru enn með í Meistaradeild karla og Rut Jónsdóttir (Esbjerg) í kvennaflokki. 

Þá sendi EHF einnig frá sér áætlun um framhaldið í öðrum keppnum sem haldnar eru á vegum sambandsins og má sjá hana hér að neðan. Fyrrgreind og neðangreind plön eru með fyrirvara um þróun mála hvað faraldurinn varðar í Evrópu.

Áætlun EHF fyrir sumarið má sjá hér fyrir neðan (þó aðeins það sem tengist íslenskum liðum):

1- 7. júní:

  • Undankeppni fyrir EM kvenna, 3. - 6. umferð. Allir leikir spilaðir á einum stað frá miðvikudegi til sunnudags, haldið af einu liðanna í riðlinum. Ísland í riðli með Króatíu, Frökkum og Tyrklandi.
  • Áskorendakeppni karla átta liða úrslit (fyrri leikur á mið/fim, seinni leikur á lau/sun). Valur leikur þar gegn Halden frá Noregi.

22. - 28. júní:

Áskorandakeppni karla. Úrslitahelgi með tveimur leikdögum. Svipað snið og Meistaradeildin og Evrópubikarinn hafa verið spiluð undanfarin ár.

29. júní - 5. júlí:

  • Umspilsleikir fyrir HM karla (fyrri leikur á mið/fim, seinni leikur á lau/sun), þetta hefur þó ekki verið staðfest ennþá þar sem IHF þar líka að koma að þessari ákvörðun.
  • U-20 ára landslið karla átti að spila á EM í Austurríki og á Ítalíu 2. - 12. júlí, því hefur verið frestað til 13. - 23. ágúst og verður þá spilað samhliða EM U-18 (sem fer fram í Slóveníu).
  • U-16 ára landslið kvenna á að spila á European Open í Gautaborg í Svíþjóð 29. júní - 3. júlí. Ekki hefur verið tekin ákvörðun um hvort þetta mót verði fært en EHF er í sambandi við mótshaldara í Svíþjóð vegna framhaldsins.