Íslenska karlalandsliðið í fótbolta lauk undankeppni fyrir HM í Katar í næst neðsta sæti í sínum riðli. Í tíu leikjum vann liðið aðeins Liechtenstein.

Undankeppninnar verður helst minnst fyrir þau kynslóðaskipti sem urðu vegna atvika utan vallar og þjálfara sem kunni ekki að synda í þeirri djúpu laug sem honum var hent í. Hann er þó að læra.

Arnar Þór Viðarsson var ráðinn landsliðsþjálfari til þriggja ára í desember 2020. Án þess að fara of djúpt í atvikin sem leiddu til falls formanns KSÍ, afsagnar stjórnar sambandsins og þess storms sem geisað hefur um stærsta íþróttasamband Íslands, þá stóð Arnar skyndilega uppi með landslið sem samanstóð af guttum sem voru óreyndir í landsliðsbolta. Á sama tíma losaði hann sig við Lars Lagerbäck, sem hafði aðrar hugmyndir en landsliðsþjálfarinn.

Fyrstu mánuðir Arnars einkenndust af klaufalegum ummælum og hann var lengi að fóta sig á svellinu. Hann átti erfitt með að mæta á blaðamannafundi án þess að hella olíu á þá elda sem geisuðu og jafnvel kveikja nýja. Á endanum var hann búinn að gera sig að slíku athlægi að Sóli Hólm skrifaði hann inn í frábæra uppistandssýningu sína.

Tölfræðin í undankeppninni:

12 - Mörk skoraði liðið

18 - Mörk fékk liðið á sig

56 - hornspyrnur

6 - markverðir voru valdir

39% - fyrirgjafa heppnuðust

3 - Víti fékk liðið

48,1% - prósent var liðið með boltann

81,41% - var sendingahlutfallið

30 - sinnum vörðu markmennirnir

20 - gul spjöld fékk liðið og eitt rautt

98 - sinnum fékk íslenska liðið aukaspyrnu

20 - sinnum var íslenska liðið dæmt rangstætt

129 - sinnum var íslenska liðið dæmt brotlegt

36 - leikmenn voru kallaðir til

4 - leikmenn hafa tilkynnt að þeir séu hættir með landsliðinu á síðustu vikum

Arnar er þó að læra og flestir eru sammála um að síðasti landsliðsgluggi hafi verið hans besti, þegar kemur að því að tala til þjóðarinnar.

„Það eru allir svekktir að hafa ekki getað ráðist á annað sætið í þessum riðli en ég geri mér fulla grein fyrir af hverju það er og ég held að fólk heima geri það líka.

Ég er þess fullviss að íslenska landsliðið mun verða mjög gott aftur,“ sagði þjálfarinn eftir lokaleikinn í riðlinum.

Hann hefur fengið einhver svör við þeim fjölmörgu spurningum sem hann hefur þurft að spyrja innan vallar. Elías Rafn Ólafsson sýndi að hann getur verið aðalmarkvörður, Brynjar Ingi er orðinn fastamaður í vörninni þó hann spili lítið sem ekkert með félagsliðinu og litlu guttarnir eflast við hverja þraut.

En stóru spurningarnar sem landsliðsþjálfarinn þarf að svara eru meðal annars hvernig hægt er að fá eitthvað frá Alberti Guðmundssyni í landsliðstreyjunni?

Er endalaust hægt að treysta á Birki Bjarnason? Hver á að leiða sóknarlínuna? Og auðvitað: Hver verður akkerið á miðjunni? Svona til að nefna nokkrar spurningar

Meðaleinkunnir íslensku leikmannana hjá þremur miðlum
Mynd/Fréttablaðið