Tómas Þór Þórðarson og Davíð Þór Viðarsson settust í settið í Íþróttavikunni með Benna Bó sem sýnd er á föstudögum á Hringbraut. Þar var meðal annars farið yfir lokakaflann í Bestu deild karla.

Nú hefur deildinni verið skipt upp í efri og neðri hluta. Öll lið eiga fimm leiki eftir, sem dreifast á helgarnar í október.

Margir hafa rætt það að of langt sé á milli leikja og að margir þeirra séu spilaðir of snemma. Það kemur meðal annars til vegna þess að það skortir víða flóðljós, meðal annars á Kaplakrikavelli.

„Það er peningaspursmál. Í ekkert alltof fjarlægri framtíð verðum við með flóðljós,“ segir Davíð, en hann er yfirmaður knattspyrnumála hjá FH.

„Það myndi gera ansi margt fyrir okkur og kannski fullkomna þetta svæði. Á næsta ári verður lagður hybrid-grasvöllur á æfingasvæðið hjá okkur. Þá erum við á toppnum aðstöðulega séð, þó við séum það ekki í deildinni.“

Næst snerist einbeitingin að deildinni sjálfri. Bikarúrslitaleikurinn á milli Víkings Reykjavíkur og FH hefur ansi mikið að segja um hana. Ef Víkingur vinnur er Evrópusæti tryggt og þriðja sæti Bestu deildar fær þannig þriðja Evrópusætið. KA er þar sem stendur, með mjög gott forskot á Val.

„Þetta verður alveg tilgangslaust ef við vinnum á laugardaginn, þá er Evrópusætið komið. En ef FH vinnur erum við í svakalegri samkeppni við frábært lið KA,“ segir Tómas.

Það er hins vegar mun meiri spenna í neðri hlutanum.

„Það er engum blöðum að fletta um það að spennan verður í neðri hlutanum. Þar er allt upp í loft og öll liðin eiga eftir að mætast innbyrðis. Þetta á eftir að verða algjörlega geggjað,“ segir Tómas.