Kurt Zouma, leik­maður West Ham United, játaði í dóms­sal í morgun að hafa sparkað og slegið til kattar síns. Zouma er sakaður um að láta köttinn sinn ganga í gegnum ó­þarfa þjáningar og að vernda hann ekki fyrir meiðslum. Hann gæti átt yfir höfði sér fimm ára fangelsis­dóm.

Sönnunar­gögn í málinu, mynd­bönd sem tekin voru upp af bróður Kurt Zouma, Yoan og fóru í dreifingu á sam­fé­lags­miðlum í kjöl­farið voru sýnd í dóms­sal í morgun varpa ljósi á hræði­lega fram­komu Kurt og Yoan í garð tveggja katta sem voru í eigu þess fyrr­nefnda.

Mynd­band af Kurt að sparka í og slá til kattar sín birtist í enskum miðlum í febrúar­mánuði og í dóms­sal í dag játaði Kurt að hafa sparkað í og slegið til kattarins.

Bæði Kurt og Yoan horfðu niður til jarðar þegar að mynd­böndin voru sýnd í dóms­sal í morgun.

Hazel Ste­vens, sak­sóknari í málinu líkti sparki Zouma í köttinn við það þegar að knatt­spyrnu­maður sparkar í bolta. Hún segir fram­komu bræðranna við kettina tvo hafa þær af­leiðingar að kettirnir hafi hlotið á­verka og orðið fyrir á­falli sem geri þá hræddari við mann­eskjur í fram­haldinu.

Þá var einnig varpað ljósi á það sem Zouma heyrist segja í mynd­böndunum ,,Ég drep hann." og ,,Ég slæ hann" er á meðal þess sem Zouma lét falla.

Zouma gæti átt yfir höfði sér allt að fimm ára fangelsis­dóm en refsingar fyrir dýra­níð voru þyngdar í Bret­landi á síðasta ári. Dómur verður felldur þann 1. júní næst­komandi.