Handbolti

Spá Fréttablaðsins fyrir Olís-deild kvenna

Olís-deild kvenna hefst um helgina með tveimur leikjum. Búast má við að Valur og Fram berjist um titilinn annað árið í röð, sérstaklega eftir vænlegan liðsstyrk sem Valur fékk í sumar. Fréttablaðið spáir um gengi liðanna.

Það verður fróðlegt að sjá hvort að Ragnheiði og stöllum í Fram tekst að vinna titilinn þriðja árið í röð. Fréttablaðið/Eyþór

Gangi spá Fréttablaðsins um deildina eftir mun Valur hrifsa Íslandsmeistaratitilinn af Fram sem er ríkjandi Íslands- og bikarmeistari. 

Valur varð deildarmeistari síðasta vor, en náði hins vegar ekki að fylgja því eftir með því að tryggja sér Íslandsmeistaratitilinn. Fram vann þann titil ásamt bikarmeistaratitlinum í fyrra en missti markvörðinn sterka Guðrúnu Ósk Maríasdóttur í Stjörnuna.

Valskonur fengu myndarlegan liðsstyrk á einu bretti þegar Íris Björk Símonardóttir, Lovísu Thompson og Söndru Erlingsdóttur til liðsins. 

Nýliðarnir tveir, Þór/KA og HK, munu svo berjast í neðri hluta deildarinnar ef spáin gengur eftir.

Spá Fréttablaðsins má sjá hér fyrir neðan.

1 Valur
Staða í deildinni í fyrra: 1. sæti | 34 stig 

Þrátt fyrir að hafa misst nánast allt byrjunarlið sitt frá síðasta keppnistímabili mætir Ágúst Þór Jóhannsson til leiks með lið sem getur klárlega farið alla leið og orðið Íslandsmeistari. 

Valur tapaði fyrir Fram í úrslitum Íslandsmótsins í vor, en nú komast þær skrefi lengra. Valur hefur fengið Írisi Björk Símonardóttur í markið sem er mikill styrkur. 

Þá mun Sandra Erlingsdóttir stjórna sóknarleiknum og hafa sér til fulltingis Lovísu Thompson sem hefur, líkt og Íris Björk og Anna Úrsúla Guðmundsdóttir sem ætla að taka slaginn með liðinu, reynslu af því að verða Íslandsmeistari.

2 Fram
Staða í deildinni í fyrra: 2. sæti | 32 stig 

Síðasta keppnistímabil var gjöfult fyrir Fram sem stóð uppi sem bæði Íslands- og bikarmeistari. Það er erfitt að afskrifa lið með Steinunni Björnsdóttur, Karen Knútsdóttur, Þóreyju Rósu Stefánsdóttur og Ragnheiði Júlíusdóttur innanborðs í baráttunni um titilinn. 

Hins vegar missti liðið Guðrúnu Ósk Maríasdóttur sem fór yfir í Stjörnuna í sumar. Markvarslan gæti orðið hausverkur fyrir Fram, en liðið treystir á tvær ungar og efnilegar stúlkur og fékk svo til liðs við sig Erlu Rós Sigmarsdóttur frá ÍBV til þess að freista þess að fylla skarð Guðrúnar Óskar.

3 ÍBV
Staða í deildinni í fyrra: 3. sæti | 30 stig  

Eyjakonur hafa þétt raðirnar svo um munar frá síðasta keppnistímabili.  Til liðsins eru komnar Arna Sif Pálsdóttir, sem er fyrsti línumaður íslenska landsliðsins, og Sunna Jónsdóttir landsliðskona í skyttuhlutverkið. 

Þessi liðsstyrkur styrkir ekki hvað síst varnarleik liðsins sem verður ógnvænlegur með þær tvær, auk Esterar Óskarsdóttur, sem valin var leikmaður ársins á lokahófi HSÍ síðastliðið vor, í miðri vörninni. Erfitt verður hins vegar að fylla það skarð sem Sandra Erlingsdóttir skilur eftir sig.

4 Haukar 
Staða í deildinni í fyrra: 4. sæti | 30 stig

Síðasta tímabil var gott fyrir Haukakonur sem náðu árangri sem var vel viðunandi. Portúgalska skyttan Maria Ines Silva Pereira verður áfram í lykilhlutverki hjá liðinu í sóknarleiknum, en liðið hefur fengið Ramune Pekarskyte til þess að efla vopnabúrið í sóknarleiknum. 

Þarna verður markvarslan ákveðið spurningamerki, en frammistaða Elínar Jónu Þorsteinsdóttur heillaði forsvarsmenn Vendsyssel og söðlaði hún um til Danmerkur í vor. Ástríður Glódís Gísladóttir mun verja mark Hauka í vetur, en hún er ungur og efnilegur markvörður sem ver mark U-20 ára liðs Íslands. 

Hún þarf að verja vel ætli Haukar að afsanna þessa spá og gera sig meira gildandi í toppbaráttunni. Ástríður Glódís mun svo fá samkeppni frá Selmu Þóru Jóhannsdóttur og Sögu Sif Gísladóttur.


Hekla Rún og stöllur ná fjórða sæti ef spá Fréttablaðsins gengur eftir. Fréttablaðið/Eyþór

5 Selfoss Staða í deildinni í fyrra: 6. sæti | 9 stig

Það mun að sjálfsögðu muna gríðarlega um það fyrir Selfoss að Hrafnhildur Hanna Þrastardóttir er orðin heil heilsu. Það mun hins vegar ekki duga til þess að liðinu takist að tryggja sér sæti í úrslitakeppni deildarinnar. 

Liðið mun verða í baráttu við Hauka og Stjörnuna um að verða fjórða og síðasta liðið þangað inn, en það er ekki mikill munur á þessum liðum og baráttan verður jöfn.  Vörn og hraðaupphlaup þar sem Perla Ruth Albertsdóttir verður í fararbroddi gætu hins vegar breytt þessari stöðu.

6 Stjarnan Staða í deildinni í fyrra: 5. sæti | 21 stig 

Niður um eitt sæti. 21 stig í fyrra. Segja má að Stjarnan mæti til leiks með nýtt lið að þessu sinni. Miklar breytingar urðu bæði á leikmannahópnum og þjálfarateymi liðsins.  Guðrún Ósk Maríasdóttir mun sjá til þess að markvarslan verði í góðum málum, Elísabet Gunnarsdóttir er reyndur og góður línumaður og Þórey Anna Ásgeirsdóttir fær stærra hlutverk í sóknarleiknum. 

Þá auka Laufey Ásta Guðmundsdóttir og Auður Ómarsdóttir breiddina í sóknarleiknum. Sebastian Alexandersson og Rakel Dögg Bragadóttir halda um stjórnartaumana hjá liðinu og eru líklega ekki sammála þessari spá og ætla að gera mun betur.

7 HK Staða í deildinni í fyrra: 2. sæti í Grill 66-deildinni, nýliði í efstu deild

Það verður hlutskipti HK að fara aftur í umspil um laust sæti í efstu deild næsta vor. Liðið er hins vegar með unga og spennandi leikmenn sem gætu hæglega þroskast hratt og orðið til þess að liðið sleppi við umrædda umspilsleiki.

Sigríður Hauksdóttir er góður hornamaður og það verður hlutverki Berglindar Þorsteinsdóttur að binda saman varnarleik liðsins. Þá eru Valgerður Þorsteinsdóttir og Díana Kristín Sigmarsdóttir öflugir leikmenn sem mikið mun mæða á.

8 KA/Þór Staða í deildinni í fyrra: 1. sæti í Grill 66-deildinni, nýliði í efstu deild

Stoppið verður stutt hjá Akureyrarliðinu í efstu deild að þessu sinni. Liðið er blanda af ungum og efnilegum leikmönnum og gömlum refum sem kunna öll trixin í bókinni í handboltafræðunum. 

Martha Hermannsdóttir og Hulda Bryndís Tryggvadóttir munu draga vagninn hjá liðinu og þá hefur Ólöf Marín Hlynsdóttir leikið vel á undirbúningstímabilinu og gæti látið til sín taka í vetur ef hún heldur áfram góðri spilamennsku sinni.

Ásdís Guðmundsdóttir er svo upprennandi línumaður sem mun vera í stóru hlutverki bæði í sóknar- og varnarleik liðsins.

Athugasemdir

Auglýsing
Auglýsing

Tengdar fréttir

Handbolti

Valsmenn með sex fulltrúa í B-landsliðinu

Handbolti

Guðjón Valur valinn leikmaður umferðarinnar

Íslenski boltinn

Landið að rísa aftur á Skaganum

Auglýsing

Nýjast

Tiger deilir forskotinu með Rose í Atlanta

De Bruyne stefnir á að ná leiknum gegn Man United

Mendy sviptur ökuleyfi í eitt ár

Þjálfari Úrúgvæ fær nýjan samning 71 árs gamall

Conor McGregor semur við UFC um sex bardaga

Birgir Leifur fékk tvo erni og nær niðurskurði

Auglýsing