Knattspyrnumaðurinn Sölvi Snær Guðbjargarson hefur skrifað undir fjögurra ára samning við Breiðablik.

Hann kemur til félagsins frá Stjörnunni í Garðabæ og hafa félagaskiptin þegar verið gerð.

Sölvi er 19 ára miðvallarleikmaður. Hann hefur spilað 55 meistaraflokksleiki með Stjörnunni og skorað í þeim 9 mörk.

Einnig á Sölvi að baki 17 landsleiki með yngri landsliðum Íslands.

„Sölvi er einn efnilegasti leikmaður landsins og frábært að fá hann í okkar raðir. Við bindum miklar vonir við hann og trúum að hann muni styrkja liðið“, segir Óskar Hrafn Þorvaldsson þjálfari Breiðabliksliðsins um sinn nýjasta leikmann.