Snæfell vann átján stiga sigur 64-46 á KR í Dominos-deild kvenna á heimavelli sínum í dag stuttu eftir að Stjarnan vann 73-62 sigur á Skallagrími.

Með sigrinum kemst Snæfell aftur upp að hlið Keflvíkinga á toppi Dominos-deildarinnar og eru liðin með tveggja stiga forskot á KR.

Þriggja stiga nýtingin varð KR að falli í dag, Vesturbæingar hittu úr tveimur af 28 skotunum fyrir aftan þriggja stiga línuna og náði KR-sóknin aldrei flugi.

Kristen Denise McCarthy var atkvæðamest í liði Snæfells með 24 stig og 13 fráköst en hjá gestunum var Vilma Kesanen stigahæst með fjórtán stig.

Í Garðabænum léku Borgnesingar í fyrsta sinn undir stjórn Biljana Stanković en tókst ekki að sækja stigin í níu stiga sigri Stjörnunnar.

Gestirnir voru allan tímann inn í leiknum en tókst ekki að sækja sigurinn í Garðabæinn.

Daniella Victoria Rodriguez var nálægt þrefaldri tvennu í dag með 23 stig, 13 fráköst og átta stoðsendingar í liði Stjörnunnar en Shequila Joseph og Maja Michalska voru stigahæstar í liði gestanna með 20 stig hvor.