Hörður Snævar Jónsson
Þriðjudagur 26. júlí 2022
09.10 GMT

Frá síðustu leiktíð eru Jóhann Berg Guðmundsson, Alfreð Finnbogason, Albert Guðmundsson, Arnór Sigurðsson og Bjarki Steinn Bjarkarson allir farnir úr þessum fimm bestu deildum Evrópu en Þórir Jóhann Helgason, leikmaður Lecce á Ítalíu, er kominn upp í efstu deild þar í landi. Þegar talað er um fimm bestu deildir í Evrópu er átt við England, Þýskaland, Ítalíu, Spán og Frakkland. Rúnar Alex Rúnarsson er leikmaður Arsenal á Englandi en allar líkur eru á því að hann fari á lán eða verða í litlu sem engu hlutverki. Mikael Egill Ellertsson er leikmaður Spezia á Ítalíu en er langt frá því að fá tækifæri í aðalliði félagsins

„Við vitum að það helst í hendur þegar leikmaður er kominn á sinn besta stað á sínum ferli að þá spilar hann iðulega í sterkari deild, það er yfirleitt ekki þegar menn eru mjög ungir og þegar leikmenn fara svo að eldast taka þeir gjarnan skrefið til baka,“ segir Arnar Þór Viðarsson, landsliðsþjálfari og yfirmaður

Þórir Jóhann í leik með íslenska landsliðinu.
©Anton Brink 2021 ©Torg ehf /

Skiptir máli fyrir Ísland
Eftir því sem fleiri leikmenn spila í þessum deildum er ljóst að karlalandsliðið verður betra en miklar breytingar hafa orðið á hópi liðsins síðustu 18 mánuðina. „Það er ekkert leyndarmál, það er samasemmerki á milli þess að því fleiri leikmenn sem Ísland á í fimm sterkustu deildunum að þeim mun betra verður landsliðið okkar. Leikmenn í þessum deildum spila á hærra tempói og eru í besta fótboltanum í Evrópu, sem er besti fótbolti í heimi. Við sem þjálfarateymi sjáum alveg mun á því þegar við skoðum marga af okkar andstæðingum, ég get nefnt Norður-Makedóníu, Rúmeníu, Albaníu og Finnland sem dæmi. Það eru lið sem eru ekki með stærstu stjörnur fótboltans en eru með marga leikmenn í þessum topp fimm deildum og það hjálpar.“

Þrátt fyrir að útlitið kunni að vera svart þessa stundina er Arnar vongóður um að á næstu árum stígi ungir og efnilegir leikmenn Íslands skrefið í þessar bestu deildir. „Við viljum auðvitað hafa sem flesta í þessum deildum og ég hef reyndar fulla trú á því að það muni breytast mjög fljótt. Við eigum marga mjög efnilega leikmenn sem hafa burði til þess að stíga skrefið í þessar deildir á næstu árum. Andri Lucas er að koma sér á mjög góðan stað í Svíþjóð, þar fær hann að spila og getur þróað sig sem leikmaður. Hákon Arnar og Ísak Bergmann eru á frábærum stað í Kaupmannahöfn. Markverðirnir okkar eru á mjög góðum stað, þessir leikmenn eru á stað til að sýna sig og sanna að þeir geti tekið skrefið í sterkari deildir. Þetta er ekki ólíkt því sem við sáum með Alfreð Finnbogason, Jóhann Berg og Sverri Inga sem voru að spila í Belgíu og Hollandi á þessum aldri og tóku svo skrefið áfram.“

Fréttablaðið/Eyþór

Þórir fljótur að aðlagast
Þórir Jóhann var fyrir rúmu ári síðan leikmaður FH í efstu deild á Íslandi, síðan þá hefur hann komið sér inn í liðið hjá Lecce og er algjör lykilmaður í íslenska landsliðinu. Þórir hefur verið jafnbesti leikmaður liðsins undanfarið ár. „Þórir er einn af þeim sem er ómögulegt að segja hvað gera. Þú sérð hæfileika í leikmönnum en sumir leikmenn þurfa tíma til að aðlagast nýjum aðstæðum á meðan aðrir mæta á svæðið og taka stór skref nokkuð auðveldlega. Þórir er einn af þeim, hann kom inn í U21-liðið og var ekkert alltaf í byrjunarliðinu til að byrja með en festi sig í sessi. Hann tekur skrefið frá FH í næstefstu deild á Ítalíu og stendur sig vel. Hann vinnur sig inn í A-landsliðið og á síðasta ári hefur hann spilað stórt hlutverk. Hann tekur þessi skref nokkuð auðveldlega. Hákon Arnar og Ísak eru að gera það sama í Danmörku, Elías Rafn markvörður er í Danmörku líka. Svo er hægt að færa þetta dæmi yfir á kvennalandsliðið, Karólína Lea sem var að taka þátt í sínu fyrsta Evrópumóti tekur það með trompi.“

Jóhann Berg féll með Burnley.

Nokkrir í stórum klúbbum
Arnar Þór segir að þrátt fyrir að Ísland eigi ekki marga leikmenn í bestu deildunum séu margir leikmenn á góðum stað. „Við eigum Rúnar Alex, sem er í risastórum klúbbi, Mikael Egill er á góðum stað. Svo er annað sem við getum ekki skautað fram hjá, það er líka gott að vera í aðeins minni deild og vera í mjög stórum klúbbi. Sverrir er hjá PAOK í Grikklandi sem er mjög stór klúbbur, Hörður Björgvin hjá Panathinaikos, sem er mjög stór klúbbur. FCK og Midtjylland eru stórir klúbbar í Danmörku. Það er líka stórt að vera í svona félögum og taka þátt í Evrópukeppnum.“

Íslenska landsliðið kemur aftur saman í september og vonast Arnar Þór eftir því að leikmenn liðsins verði á góðum stað þá. „Við tókum okkur frí eftir júnígluggann sem var langur og strangur. Núna erum við komnir á fullt að skoða leikmennina okkar, belgíska deildin fór af stað um helgina sem dæmi og þessar deildir eru að rúlla af stað. Við erum spenntir því að mínu mati eru allir okkar leikmenn komnir á góðan stað, Jón Dagur fékk flottan klúbb í Belgíu, Andri Fannar fór til Hollands og svo fóru Arnór Sigurðsson og Andri Lucas til Svíþjóðar. Það eru mjög fáir sem maður getur nefnt sem eru í vandræðum hjá sínu félagi. Við erum að fylgjast með því hvernig menn koma til leiks eftir undirbúningstímabilið. Svo vonandi förum við í úrslitaleik í Þjóðadeildinni í haust með liðið á góðum stað.“

Athugasemdir