Selfoss tyllti sér á topp Olís-deildar karla með sigri á Val, 28-24, í Hleðsluhöllinni í kvöld.

Staðan var jöfn í hálfleik, 10-10, og liðin héldust í hendur fram í miðjan seinni hálfleik.

Þá breyttu Selfyssingar stöðunni úr 16-17 í 21-17 og náðu undirtökunum. Selfoss náði mest sex marka forskoti en á endanum munaði fjórum mörkum á liðunum, 28-24.

Elvar Örn Jónsson og Haukur Þrastarson voru markahæstir í liði Selfoss með sex mörk hvor. Hergeir Grímsson átti einnig góðan leik og skoraði fimm mörk. Pawel Kiepulski varði 15 skot í markinu (42,9%).

Vignir Stefánsson og Anton Rúnarsson skoruðu fimm mörk hvor fyrir Val sem tapaði sínum fyrsta leik í kvöld.

Upplýsingar um tölfræði eru fengnar frá HB Statz sem er komið í samstarf við HSÍ.