Sænskur blaðamaður greinir frá því í dag að í spjalli við markmannsþjálfara íslenska karlalandsliðsins í handbolta hafi komið fram að læknateymi Íslands hafi ekki fengið að skoða meiðsli Arons Pálmarssonar betur en hann gat ekki gefið kost á sér á mótinu vegna meiðsla.

Í tilkynningu HSÍ á sínum tíma kom fram að eftir skoðun læknateymis íslenska liðsins væri ljóst að Aron gæti ekki gefið kost á sér.

Hann kom því aldrei til móts við íslenska liðið og er ekki með liðinu á HM í Egyptalandi.

Johann Flinck á Aftonbladet birti í dag tíst þar sem hann segir að Tomas Svensson, sænski markmannsþjálfari Íslands, hafi sagt að læknir íslenska liðsins hafi aldrei fengið að skoða Aron í aðdraganda HM.

Í færslunni kemur fram að Svensson telji að þetta gæti tengst samningaviðræðum Arons við Barcelona um framlengingu.