Forseti pólska stórliðsins Vive Kielce staðfesti áhuga á að semja við Selfyssinginn unga Hauk Þrastarson en bætti við að öll stærstu félög Evrópu séu að fylgjast með honum þessa dagana.

Haukur sem verður átján ára á þessu ári hefur verið í lykilhlutverki hjá Selfossi undanfarið ár sem leiddi til þess að hann var valinn í íslenska landsliðið fyrir HM.

Þá var hann valinn besti leikmaður mótsins á Evrópumóti U18 síðasta sumar.

„Hann er einn eftirsóttasti leikmaður heims þessa dagana enda getur hann náð jafn langt og Aron Pálmarsson. Ég veit að PSG, Kiel og Flensburg eru öll áhugasöm um hann og er viss um að öll stærstu lið Evrópu séu með nafn hans á lista því hann hefur allt sem þarf til að verða besti handboltamaður heims á næstu árum,“ sagði forseti Kielce, Bertus Servaas.