Forseti Rússlands, Vladimír Pútín og emírinn í Katar, Sheikh Tamim bin Hamad Al Thani funduðu í dag þar sem það kom fram að Rússar eru að aðstoða Katar við skipulagningu mótsins.

Þegar tæpur mánuður er í opnunarleik HM í Katar stendur lokaundirbúningur yfir í olíuríkinu Katar í Mið-Austurlöndunum.

„Rússland hefur reynst skipulagsnefnd HM 2022 í Katar vel,“ kom fram í ávarpi emírsins og tók Pútín í sama streng. „Ég óska Katar góðs gengis með HM 2022 og við erum tilbúin að veita þeim aðstoð okkar.“

Rússar verða ekki meðal þátttökuþjóða enda í banni frá keppni á vegum Alþjóða- og evrópska knattspyrnusambandsins eftir að innrásin í Úkraínu hófst.

Pútín og Al Thani sátu fund í dag en þeir eru viðstaddir ráðstefnu Asíuríkja til að efla samskipti (e. Conference on Interaction and Confidence-Building Measures in Asia) í Astana í Kasakstan í dag.